Hirukidek, Euskadiko Kide Ugariko Familien Federazioak, bere bulegoa Irunera hurbilduko du datorren maiatzaren 21ean. Ekimen honen helburua Irun eta inguruko udalerrietako kide ugariko familiei zuzeneko arreta eskaintzea da, dituzten eskubide, abantaila eta diru-laguntzen berri emateko. Zerbitzua Palmera Montero guneko 4. gelan kokatuko da, Leandro Agirretxe plazatxoan, eta egun osoan zehar egongo da martxan, goizeko 09:30etik 14:00etara eta arratsaldeko 15:00etatik 18:00etara.
Hurbiltzen diren familiek kide ugariko familien eskubideei, dirulaguntzei, hobariei eta baimenei buruzko informazio zehatza jaso ahal izango dute. Gainera, kolektiboaren inguruko azken lege-aldaketak, elkarteak udalerrian egiten duen lana eta eremu pribatuan lortutako azken abantailak azalduko dira. Horrez gain, familiek euren kezkak edo iradokizunak helarazi ahal izango dizkiote federazioari, erakunde publiko zein pribatuetara bideratu ditzaten.
Izen ematea
Arreta jaso nahi duten familia guztiei harrera egingo zaien arren, formulario baten bidez aldez aurretik izena ematen dutenek lehentasuna izango dute arreta zuzena eta pertsonala jasotzeko orduan. Zalantzarik edo iradokizunik izanez gero, Hirukiderekin harremanetan jar daiteke hirukide@hirukide.com helbidearen bidez edo 945 25 36 02 eta 688 72 89 31 telefono zenbakietara deituz.
