Udalak programa berezi bat prestatu du asteburu honetarako, hiritar guztiei zuzendua, Irugurutzetako interpretazio-zentro berria eta ingurune birgaitua ezagutarazteko. Ekimen honen bidez, ondarea, natura eta jarduera kulturalak uztartu nahi dira gune historiko honetan. Asteburu osoan zehar, interpretazio-zentrorako sarrera doakoa izango da. Larunbatean, maiatzak 23, 11:00etatik 13:00etara eta 16:00etatik 19:00etara egongo da irekita; igandean, aldiz, 11:00etatik 14:00etara.
Meatzaritza-gunera igotzeko, Tren Txikitoaren zerbitzua jarriko da martxan. Irteerak ostiralean (16:00etan eta 17:30ean), larunbatean (11:00etan, 16:00etan eta 17:30ean) eta igandean (11:00etan eta 12:30ean) egingo dira. Tren txikian joan nahi duten pertsonek Oiasso museoan egin beharko dute erreserba. Horrez gain, maiatzaren 23an eta 24an, goizeko 11:00etan, ibilaldi gidatuak antolatu dira ingurune naturala eta meatzaritza-gunearen sekretuak deskubritzeko; kasu honetan ere, aldez aurretik izena eman beharko da Oiasso museoaren webgunean.
Egitarau kulturala
Larunbaterako, maiatzak 23, familiei zuzendutako egitarau oparoa prestatu dute goiz eta arratsaldez. Goizean, 11:00etan, Ondare Kultur Elkarteak erraldoi-ikuskizuna eskainiko du eta, 12:00etan, Txiribuelta elkarteak familientzako tailerrak egingo ditu. Arratsaldean, kultur eskaintzak 17:00etan jarraituko du Ameli ipuin-kontalariarekin, eta eguna amaitzeko, 18:00etan, A&B Shows elkartearen mini-zirku ekitaldiaz gozatzeko aukera egongo da.
