Amaitu dira oraingoz Valentziako uholdeengatik kaltetutakoak laguntzeko material eta elikagai bilketak. Hiru egun hauetan bildutako elikagai eta material guztia Valentziara bidaltzeko unea da orain. Horregatik, bildutako material guztia garraiatzeko kamioiak eta furgonetak behar dira.
Garraio eta diru ekarpenak
Orain garraiobideak behar dituzte materiala kargatzeko eta Valentziara jaisteko. Zeregin horretan lagun dezaketenek, Instagram bidez @ayudaparavalenciadesdebidasoa kontura idatzi edo ayudaparavalenciadesdegipuzkoa@gmai.com helbidera idatzi dezakete. Mezuan boluntarioekin harremanetan jarri ahal izateko datuak eman behar dira.
Hortaz gain,Valentziaraino iritsi ahal izateko gasolina behar dute. Baliabide ekonomikorik gabeko egitasmoa izanda, Bizum bidez diru ekarpenak egiteko laguntza eskatu da bidaiaren gastuak ordaintzen laguntzeko. Diru ekarpenak 676 012 064 mugikor zenbakira bidal daitezke Bizum aplikazioaren bidez.
Hurrengo bilketak
Bestetik, ez dute baztertzen aurrerago berriro bilketa solidario gehiago egitea. Orain ordea, bilketa puntua, biltegia eta pabiloia topera bete direnez, bildutako guztia Valentziara bidaltzeko modua bilatzea da lehentasuna. Berriro bilketak antolatzekotan, noiz eta non egingo diren jakinaraziko dutela iragarri dute.
