Gaur goizean, goizeko 11:30ean, ekitaldi instituzionala ospatu da Irungo Udaletxean apirilaren 8an ospatzen den Ijito Herriaren Nazioarteko Eguna dela eta. Urteroko hitzordu honen helburua komunitate honen historia, kultura eta eskubideak aitortzea da, eta hiriko agintariak zein gizarte-eragileak bildu ditu udaletxeko arkupeetan.
Ekitaldiaren ardatza eguneko komunikatuaren irakurketa izan da. Hitz horien bidez, ijito herriak mendeetan zehar jasandako zailtasunak gogorarazi dituzte, baina baita lortutako garaipenak eta berdintasunaren bidean eman beharreko hurrengo urratsak ere. Irakurketak elkarbizitzarako eta diskriminazio mota oro baztertzeko deia egin die herritarrei.
Une gorena ijitoen bandera udaletxeko balkoi nagusian igo dutenean iritsi da. Ikur hau, urdina eta berdea erdian gurpil gorri bat duela, gaurko egun osoan zehar egongo da Irungo udaletxeko balkoian zintzilik, egun honetako ospakizunari lotutako ohorezko keinu gisa.
Ekitaldian protagonismo berezia izan dute udalerriko ijitoen elkarteek. Kera eta Kale Dor Kayiko elkarteetako ordezkariak izan dira ekitaldiaren buru, eta beraiekin batera udal ordezkari politikoak egon dira.
