IRUDEK Bidasoa Irunek ABC Braga hartuko du EHF European Leagueko Qualification Roundeko joanekoan. Taldeak multzoko fasera sailkatzeko helburuarekin jokatuko du. Hitzordua, abuztuaren 30ean, larunbatean, 18:30etan, Artalekun izango da.
Álex Mozas, IRUDEK Bidasoa Iruneko entrenatzaileak, irundarrentzat denboraldiko lehen partida ofizialera nola heltzen diren azaldu du. Mozasek adierazi duenez, “uste dut asteburu honetan Egia torneoa izan ondoren, maila handiko bi aurkari izan ditugula; proba ona izan zen guretzat oso lehiakorrak gaudela ikusteko. Irudek Bidasoa Iruneko entrenatzaileak adierazi du txapelketatik sentsazio onarekin atera zirela eta ilusioarekin doaz larunbatean hain erabakigarria izango den partidan lehiakorrak izango direlakoan.
Entrenatzaile madrildarrak ABC Bragaren denboraldi-aurreko zenbait gako aipatu ditu. “Oso denboraldi-aurre ona egin dute. Lau partida ikusi dizkiegu eta uste dut gauza asko gorde dituztela”. Horrez gain, haien jokalarien arriskuak nabarmendu ditu. “Iazko bi zentral galdu dituzte, baina esperientzia handiko jokalari oso onak ere fitxatu dituzte, Fabio Magalhaes kasu, Portugalekin askotan internazionala izan dena. Talde ona da, oso landuta dago. Entrenatzaileak urte asko daramatza han, oso ondo daki zertan jokatzen duten eta barietate handia dute. Zazpi kontra sei jokatzen dute, defentsan sei zero, bost bat ere egiten dute, barietate handia dute eta talde ona da”, esan du Mozasek.
Bidasotarren entrenatzaileak zaleen babesaren garrantzia eta etxean jokatzeak duen balioa ere azpimarratu ditu. “Une zaila da, iaz Europan bizi izan genituen gauza horietako bat errepikatzeko itxaropenak izateko, datak direla eta. Baina bai espero dut etortzen den jendeak beti bezala babestea. Etxean jokatzeak beti ematen du plus bat horregatik”, azaldu du.
Bestalde, Eneko Furundarenak taldeko fitxaketen garrantziaz hitz egin du. “Taldean Peciña bezalako jokalari bat edukitzea oso garrantzitsua da, Europan esperientzia handia duelako eta, aldi berean, jokalari gazteak sartu direlako. Uste dut beteranoen eta gazteen arteko oreka hori oso garrantzitsua dela fitxaketetan”.
Azkenik, Usurbilgoak zaleei dei egin die larunbatean Artalekura etortzera. “Artalekun gure publikoaren bultzadarekin ahalik eta abantailarik handiena lortzen saiatu behar dugu itzulirako. Gainera, gure jokoa beraienaren gainetik jarri behar dugu, horrela garaipena eta hurrengo fasera pasatzea gertuago egongo baitira”, amaitu du Furundarenak.
