Urriaren 11tik urtarrilaren 19ra bitarte Menchu Gal artistaren jaiotzaren mendeurrena ospatzeko erakusketa egingo da. Erakusketa artistaren izena daraman aretoan egingo da eta 21 obren bilduma ikusi ahalko da bertan. “Margotzeko bizi, bizitzen margotu” izenburua duen erakusketa artista irundarraren jaiotza omentzeko antolatu den ekitaldi nagusietako bat izango da. Erakusketa ostiral eta larunbatetan 18:00etatik 21:00etara eta igande eta jaiegunetan 11:30etatik 13:30etara bisitatu ahalko da.
Erakusketak artistaren 21 obra biltzen ditu, udal bilduma, Menchu Gal fundazioa, kolekzio pribatu eta Gipuzkoako Foru Aldundiaren kolaborazioaren bitartez bildu direnak. Lanen artean Irun eta Txingudi badiako pasaiak ikusi ahalko dituzte erakusketaren bisitariek. Hortaz gain, artistak magotzea atsegin zuen loreen lan ugari erakutsiko dira, Menchu Galek kolore ezberdinak lantzeko zuen gustua gogora ekartzeko.
Bilduma katalogoa
Erakusketaren harira, 315 orriz osatutako katalogo bat eratu da artista irundarraren lana laburbiltzeko. Katalogoak euskara eta gaztelerazko edizioak izango ditu eta 20 euroren truke eskuratu ahalko da. Bertan, Edorta Kortadi, María Cóndor, Francisco Calvo Sarraller eta Miguel Zugazaren testuak biltzen dira.
Bestelako ekintzak
Erakusketaz gainera, bestelako ekintzak antolatu dira Menchu Galen jaiotzaren 100 urteak ospatzeko. Adibidez, formatu handiko oinarri batzuk kokatu dira hiriko puntu ezberdinetan, Menchu Galen 8 koadroen erreprodukzio handiekin. Hortaz gain, hiriko elkarte ezberdinekin kolaborazioak egin dira ere mendeurren honen harira. Adibidez, Marrazki eta Pintura akademiak data berezi horrekin loturiko ekintza ugari antolatu zituen programa honen barnean. AFI elkarteak, berriz, “argazki-elkarrizketak” erakusketarekin 12 margolanen interpretazioa egin zuen argazkilaritzaren bitartez. Il Duomo elkarteak hizketaldi bat antolat du duela gutxi 5 emakume artistekin, parte-hartze zabaleko mural bat egiteaz gainera.
