Bertsoak: Gotzon Aizpiolea Etxegoien
Doinua: Gaixo nengoen joan dan aspaldin
Negu honetan gertatu zaigu
gehiegiri gertatua
eta pasa dut denbora pixkat
Ospitalean sartua.
Itxaron gelan marrak kontatuz
izan dut zer pentsatua;
ederra dela eredu honek
eskaintzen digun tratua.
Bateko zerga, besteko BEZa
kontua da ordaintzea,
diotelako eman behar dela
kostatzen dena lortzea.
Aurpegi polit bat erakutsiz,
ezkutatuaz atzea,
lapur zuriek, erreza dute
gurea dena hartzea.
Marrak kontatzen ari ginela
iritsi zitzaigun txanda.
Goizeko laurak baziren jada,
haurra besotan etzanda.
Berriz kontsultan utzi gintuzten
beste norabait joanda,
leher eginda ginelako ez
genuen egin eztanda.
Baina eseri eta lasaituz
pentsatu nuen ordea,
medikuaren posizioa
ez zela askoz hobea,
ziztu bizian egiten zuen
zezakeenaren doblea.
Bera horrela zerabilkien
gaitza bai zela grabea!
Abiadura hura ikusiz
gogoratu nuen trena,
inori ezer galdetu gabe
egiten ari direna.
Nork eman die gure dirua
hormigoitzeko baimena?
Tren azkarrago bat ote da ba
herritarrontzat onena?
Lapurreta bat ikusten dugu
gure muturren aurrean
Politikari jeitsi mundura
ta jarri hankak lurrean!
Joka ezazu duintasunez,
jendea modu txarrean
baldosetako marrak kontatuz
torturatu beharrean!
