Ficobak eta AZTI zentro teknologikoak antolatutako Uhinak Klima Aldaketari eta Itsasertzari buruzko Nazioarteko Kongresuaren zazpigarren edizioa egingo da urriaren 8an eta 9an Ficoban. Topaketak komunitate zientifikoko, administrazio publikoetako eta enpresa arloko ordezkariak bilduko ditu, ozeanoetan gertatzen ari diren aldaketak eta kostaldeko eremuetan dituzten ondorioei aurre egiteko erantzunak aztertzeko helburuarekin. Nazioarteko izaera eta ikuspegi praktikoa indartuz, programak ahozko 40 komunikazio, 25 poster, eduki zientifiko handiko bi hitzaldi nagusi eta bi mahai-inguru biltzen ditu.
Hitzaldi nagusiei dagokienez, Antonio Turiel CSICeko ikertzaileak ozeanoaren zirkulazio globalean zein Ipar Atlantikoan izandako azken aldaketak eta klima-aldaketaren balizko azelerazioa jorratuko ditu. Bestalde, Melisa Menéndez IHCantabriako ikertzaileak klima-aldakortasunak muturreko itsas mailan eta olatuen gertakarietan dituen eraginak azalduko ditu, arriskuei aurrea hartzeko eta kostaldeetan egokitzapen neurriak diseinatzeko gakoak eskainiz.
Aurtengo berrikuntza nagusietako bat kostaldeko udalerriei eta udalei bereziki zuzendutako bi mahai-inguruak izango dira, kongresuaren bigarren egunean. Bertan, tokiko administrazioek dituzten erronkak, egokitzapen proiektu praktikoak (hala nola Zarauzko, Galesko zein Akitania Berriko adibideak) eta etorkizuneko estrategiak (EAEko Itsasertza Babesteko Lurralde Planaren berrikuspena, KAIA foroa edo Bideometriako Foru Sarea) landuko dira. Ekimenak hainbat erakunderen babesa du, tartean Eusko Jaurlaritza (Ihoberen bidez), Gipuzkoako Foru Aldundia, Euskal Hirigune Elkargoa eta Akitania Berria Eskualdea.
