Irungo Udalbatzak, urriko ohiko osoko bilkuran, aho batez onartu du Udaltzaingoaren plantilaren pixkanakako handitzea: 2027ra bitartean, 15 agente berri sartuko dira. Bilkuran bestelako erabakiak hartu dira ere, hala nola, zerga, tasak eta prezio publikoen egokitzea edo ahalmen ekonomikoaren araberako ordainketa sistemaren hedapena. Bestetik, Hegoaldeko Erronda eta Irun Txartelari eragiten dioten berritasunak ere landu dira.
Udaltzaingoaren handitzea
Neurri honekin, Udaltzaingoko plazen kopurua 104tik 119ra igoko da, hiriko segurtasun eta bizikidetza beharrei erantzuteko. Azkenean, Udaltzaingoa moderno, eraginkor eta gertukoagoa izatea da helburua, kalean gehiago ibiltzea, eta delituei aurrea hartzeko prebentzioan eta delituen kontrako zuzeneko esku hartzean oinarritzea.
Plantilaren hazkundea, esan bezala, mailakakoa izango da. 2025 bukatu bitartean, zortzi plaza berri sortuko dira: komisario burua, komisariordea, ofizial bat, bi ofizialorde eta bost agente. 2026an eta 2027an, berriz, agenteentzako beste zazpi postu sortuko dira. Horrela, bide batez, aginte egitura sendotuko da, eta unitateak eta zerbitzu egiteko txandak hobeto koordinatuko dira.
Cristina Laborda alkateak akordio honen garrantzia azpimarratu du, “Udalak duela gutxi izan duen langile-gehikuntzarik handiena da, talde politikoek urteak daramatzagun segurtasunaren eta bizikidetzaren aldeko itunaren ondorioz”. Alkateak azaldu du horrela, argi geratzen da segurtasunaren aldeko apustua ez dela hitzetan soilik geratzen, baizik eta ekintza bihurtzen dela. “Polizia gehiago egongo da, kalean agente gehiago eta kamerak bezalako neurri gehiago. Eskaerei erantzuten diegu, eta ostalaritza eta merkataritza bezalako sektore kezkatuekin, eta hiriarekin oro har, betetzen dugu”, gehitu du Labordak.
Zergak, tasak eta prezio publikoak egokitzea
Osoko Bilkuran 2026an tasak, zergak eta prezio publikoak % 2,7 eguneratzea onartu du, udal zerbitzuen kalitateari eusteko eta haien jasangarritasun ekonomikoa bermatzeko, baita, ahalmen ekonomikoaren araberako ordainketa sistema garatu eta hedatuta, tokiko zerga sistemaren progresibitatea areagotzeko.
Zergak (adibidez, ondasun higiezinen gainekoa, trakzio mekanikoko ibilgailuen gainekoa eta jarduera ekonomikoen gainekoa) zein tasak (herritarrek udal zerbitzu gehienen trukean ordaintzen dituzten prezioak) % 2,7 eguneratuko dira, joan den abuztuko KPIaren arabera.
Badira salbuespenak doikuntza horretan: TAO zerbitzuaren tarifak, salbu eta egoiliar txartelarena eta salaketak kentzekoa, eta etxez etxeko laguntza zerbitzuarenak izoztu egingo dira, Ogasun Arloak kasu bakoitza arretaz aztertu duen adierazgarri.
Ahalmen ekonomikoaren araberako ordainketa
Udalbatzak ahalmen ekonomikoaren araberako ordainketa sistema hedatzea ere onartu du –2025ean jarri zen martxan sistema hori–, sistema osatzen duten lau tarteak zabaltzea alegia, eta, ildo horretatik, gehienekoa 8.000 euro inguru igotzea, 29.000 eurotik 37.000 eurora gutxi gorabehera.
Horri esker, ia 5.000 zergadunek gehiagok baliatu ahalko dituzte tarifa berriak, eta, horrela, familia irundarren % 80k gutxiago ordaindu ahalko dute udal zerbitzuak erabiltzeko.
Zehazki, Eustaten arabera, % 70 ingurutik % 80 ingurura igoko da tarifa berriak balia ditzaketenen ehunekoa.
Hegoaldeko Erronda
Hiri-garapenari dagokionez, Hegoaldeko Errondaren eremuko Plan Orokorraren aldaketa puntualaren behin-behineko onarpena azpimarratu behar da. Aldaketa horren helburua Elizatxo-Euskal Herria ardatza deskargatuko duen proiektuaren bigarren fasean aurreikusitako trazadura egokitzea da, trafikoak hiriaren hegoaldera gutxiago kargatutako ibilbide batetik bideratuz. Horrela, bide-zati berri bat sortuko da, Hegoaldeko Ingurabidearen trazadurari jarraipena emango diona, Olaberriako errepidean lotunea izango duena, Berio kalearekiko bidegurutzean.
Berritasunak Irun Txartelan
Eta azkenik, aipagarria da Irungo Udalaren gehitzea Eusko Jaurlaritzaren eta Eudelen arteko Lankidetzarako Esparru Hitzarmenari, herritarrek toki administrazio bakoitzaren lineako zerbitzuetarako sarbidea izan dezaten ‘NIK Patrika Digitala’ aplikazio mugikorraren bidez. Horrek aukera ematen du Irun Txartelak bat egin dezan zorro digital bakar horrekin, eta, horrela, gaur egun ‘Irun Txartelaren’ bidez sar daitezkeen zerbitzuak erraztu ahal izango dira, hala nola, udal kiroldegietara sartzea edo edukiontziak irekitzea, besteak beste.
