Martxoko lehen bi asteetan zehar, Irungo hainbat ikastetxetako Lehen Hezkuntzako laugarren mailako ikasleek Udaltzaingoaren instalazioak bisitatu dituzte. Jarduera hau Herritarren Segurtasuna eta Bizikidetza arloko Bide Hezkuntza sailak antolatu du, agenteen eguneroko funtzionamendua gazteenei hurbiltzeko asmoz. San Vicente de Paul, El Pilar, Irungo La Salle eta Belaskoenea ikastetxeek parte hartu dute ekimenean.
Bisita hauen helburu nagusia ikasleei prebentzioa, bide-segurtasuna, udal-ordenantzak betetzea eta herritarrei arreta ematea bezalako arloetan egiten den lana ezagutaraztea izan da. Ordu eta laurden inguruko saioetan, ikasleek Udaltzaingoko hainbat gune zeharkatu dituzte Bide Hezkuntzako agenteek eta Larrialdietako teknikariak lagunduta.
Ibilbidean zehar, honako gune hauek ezagutu ahal izan dituzte: Briefing/krisi eta aginte-postu gela, transmisioen zentrala eta trafiko-biltegia, polizia-ziegak eta Udaltzaingoaren eta Babes Zibilaren ibilgailuen aparkalekua. Gune bakoitzean, bertan egiten diren lanak azaldu zaizkie eta autobabesaren eta larrialdi-kasuetan prestatzearen garrantzia azpimarratu zaie.
Jarduerak lanbidearen alderik hurbilena eta gizatiarrena erakutsi nahi izan du, Udaltzaingoa zerbitzu publiko gisa aurkeztuz. Iñigo Berges Herritarren Segurtasun eta Bizikidetzarako ordezkariak nabarmendu duenez, “hezkuntza oso garrantzitsua da hirian bizikidetza handiagoa eta hobea izateko”. Haren ustez, gazteenak funtsezkoak dira errespetuan oinarritutako hiri seguru eta atsegin bat eraikitzeko.
