Irunek Sagarfest jaialdiaren lehen edizio ofiziala hartuko du datorren 2026ko maiatzaren 10ean. Sagarrek proiektuaren eskutik datorren ekimen honek sagarrondoen loraldia ospatzea du helburu, natura eta euskal tradizioa uztartzen dituen egun osoko egitarau baten bidez. Ekintzak goizeko 10:00etan hasi eta arratsaldeko 18:00ak arte luzatuko dira, Sagarrek eremuan.
Aurretik egindako sagarrondoen inaugurazio ekitaldien arrakastaren ondoren, eta jendearen eskaerari erantzunez, Sagarfest jaialdi bihurtu da aurten. Ekitaldiak sagar eta sagardoaren mundua ikuspegi jasangarri, kultural eta hezitzaile batetik ezagutarazi nahi die herritarrei. Horrela, landa-ingurunearen eta nekazaritza sektorearen balioa nabarmendu nahi da, belaunaldi ezberdinen arteko topagunea sortuz.
Jardueraz beteriko eguna
10:00etatik 18:00etara, bertaratutakoek era askotako jarduerekin gozatu ahal izango dute Sagarrek proiektuaren lursailetan. Batetik, bisita autogidatuak egingo dira, sagarrondoak eta ingurune naturala ezagutzeko aukera emanez. Bestetik, tokiko produktuak eta artisautza ardatz izango dituen merkatu kulturala egingo da. Bien bitartean, arte eszenikoak eta tokiko musikaz zuzenean gozatzeko aukera egongo da. Era berean, sormen-espazioak antolatuko dira, adin guztientzako diseinatutako tailer eta jolasak.
Oihana Recalde Casado antolatzaileak azpimarratu dutenez, esperientzia irekia eta irisgarria da, lagunartean zein familian gozatzeko aproposa. Gainera, animalien zaleentzat berri ona dago: txakurrak ere ongi etorriak izango dira jai-eremuan.
Lurrarekiko lotura
Sagarfest ez da ekitaldi isolatu bat, Irunen garatutako Sagarrek nekazaritza-ekimenaren parte baizik. Proiektu honek EAEko Jatorrizko Deitura Babestua duten sagar ekologikoen laborantzan jarduten du, sagardoa ekoizteko helburuarekin. Era berean, hezkuntza eta kultura jarduerak sustatzen dituzte komunitatearen eta lurraren arteko lotura sendotzeko. Jaialdiaz gozatu nahi dutenek, sarrerak eskuragarri dituzte jada proiektuaren webgunean.
Antolatzaileen asmoa da Sagarfest urteroko hitzordu bihurtzea, iraunkortasuna eta tokiko kultura ardatz hartuta, landa-ingurunearen balioa indartzen jarraitzeko.
