Irungo Udaleko Kultura Zerbitzuak eta Filohelena ‘Periplo’ Elkarte Soziokulturalak X. Jardunaldi Grekoa antolatu dute datorren urriaren 3rako Oiasso Museoan. 2016tik ospatzen den ekimen honek milaka urteko greziar hizkuntza hartuko du ardatz nagusitzat aurtengoan, UNESCOk Grekoaren Munduko Eguna formalki aldarrikatu izana ospatzeko. Topaketak elkarrekintza eta ikaskuntza aktiboa bultzatuko ditu, herritar guztiei irekitako proposamen dinamiko baten bidez.
Egitaraua goizeko 11:30ean abiatuko da 6 eta 12 urte bitarteko haurrei zuzendutako tailer batekin; Sofia Roilidou irakasleak Eseporen fabulak, abestiak eta marrazkiak erabiliko ditu greziar tradizioa hurbiltzeko. Arratsaldean, 17:00etan, greko modernoa praktikatzeko elkarrizketa-taldeak eta hizkuntza ezagutzeko hastapen-eskola egingo dira aldi berean adituen laguntzaz. Ondoren, 18:00etan, Apostolos Baltas Greziako enbaxadorearen agurraren ostetik, bi hitzaldi nagusi eskainiko dira: bata, grekoak gaztelanian duen eraginari buruz (Sofia Roilidouren eskutik), eta bestea, hizkuntzaren garrantzi filosofiko zein literarioari buruz (Alicia Villar Lecumberri doktorearen eskutik).
Doako izen ematea
Jardueretan parte hartzea doakoa da. Haurren tailerrean zein greko modernoaren oinarrizko klasean parte hartzeko aldez aurretik izena eman beharko da Oiasso Museoan bertan (info-oiassomuseo@irun.org edo 943 63 93 53 telefonoan). Arratsaldeko hitzaldietarako sarrera, berriz, librea izango da lekua bete arte.
