Integrazioa da Adiskidetuak elkartearen jarduera laburbiltzeko hitz aproposena. 2023ko lehen seihilekoan elkarteak 2.290 kontsulta erantzun ditu eta egun 465 erabiltzaile ditu. Adiskidetuk edozein jatorriko etorkinekin lan egiten du eta Irungo Udaleko Euskara Arloko Kalean Bai programara atxikitako elkarteetako bat da. Karla Zavala elkarteko presidenteak Adiskidetuak elkarteak eskaintzen dituen zerbitzuak azaldu ditu.
Zer da Adiskidetuak?
Adiskidetuak 2000. urte inguruan sortu zen kulturarteko elkarte bat da, etorkinen eta tokiko jendearen arteko integrazioaren aldeko sozializazio jarduerak antolatzeko helburua duena. Urteak igaro ahala, pertsona horien beharrei erreparatu eta proiektu berriak sortu ziren. Elkarteak edozein nazionalitatetako pertsonak artatzen ditu, betiere Bidasoko eskualdean geratzeko asmoa badute.
Zer zerbitzu eskaintzen ditu elkarteak?
Hasteko, enplegua bilatzeko sozializazio eta integrazio proiektuak egiten hasi ginen. Denborarekin, dirulaguntzen deialdietara aurkeztu ginen, kolektiboen arazoetan edo eragozpenetan sakonago lan egin ahal izateko. Eusko Jaurlaritzaren bidez, zerbitzu juridikoen sistema batean sartzea lortu genuen, Aholku Sarearen bidez estranjeriaren arloko zerbitzu profesionala eman ahal izateko. Horrela, pertsona horiei laguntzen diegu beren egoera erregulatzea lortzen duten arte.
Zer proiektu dituzue martxan oraintxe bertan?
Atzerritartasun arloko aholkularitza juridikoko zerbitzuaz gain, urte osoan zehar eskuragarri dagoena, Gipuzkoako Foru Aldundiarekin batera, integrazio programak ditugu, hala nola lehen harrerako edo arreta integraleko proiektuak, ikusezinak diren pertsonei eskaintzen zaizkienak, hau da, erroldatuta ez daudenei edo kalean daudenei. Etxeko emakume langileentzako edo adineko emakumeentzako proiektuak ere baditugu. Prestakuntza tailerrak eta informazio tailerrak ere antolatzen ditugu, autoestimu tailerrak edo tokiko sukaldaritza tailerrak, esaterako. Gainera, gazteekin zein haurrekin ere lan egiten dugu beraientzako ekintzak antolatuz.
“Elkarteak edozein nazionalitatetako pertsonak artatzen ditu, betiere Bidasoko eskualdean geratzeko asmoa badute”
Karla Zavala, Adiskidetuak elkarteko lehendakaria
Migratzaileek zuek emandako laguntza asko eskertzen dute, ezta?
Gizarte zerbitzuen edo HAZen bidez guregana iristen den jende asko jasotzen dugu, gehienak errolda faltagatik. Erroldatzea da edozer gauza hemen egiteko ate nagusia. Ulermenetik abiatuta, jendeari laguntzen saiatzen gara, ez baitakigu hemen geratuko ote diren edo, besterik gabe, bidean ote dauden. Baliabideak mugatuak direnez, hemen geratzeko interesa duten pertsonak bideratzen saiatzen gara. Migratzeko modua asko aldatu da. Lehen, pertsonek bakar-bakarrik migratzen zuten leku jakin batean bizitzen geratzeko asmoz eta, ondoren, familia osoa lekualdatzeko. Orain, ordea, familiek elkarrekin egiten dute bidaia osoa hasieratik, eta, horregatik, guztien beharrei erantzun behar diegu bat-batean.
Irun kultura anitzeko hiri gisa definitu daiteke?
Bai. Zalantzarik gabe, munduko gertaerek garrantzi handia dute migrazio fluxuetan, hala nola Ukrainako gerrak. Azkenaldian, herrialde afrikarretan gertatzen ari den pertsona exodo horren ondorioz honaino iritsi den jende askori ere eman diogu arreta. Horiekin, lantzen ditugun gaien artean ditugu eskolatzea, etxebizitza bilaketa edo osasun arreta. Lan atal handia da, eta, gainera, epe luzera egin behar da.
Duela gutxi bat egin zenuten Kalean Bai ekimenarekin. Zergatik batu zarete egitasmora?
Ekimen honetan murgiltzeko gonbidapena jaso genuen eta oso interesgarria iruditu zitzaigun. Hasiera-hasieratik, gure jarduerak pertsona migratzaileen integraziora bideratuta egon dira, eta, horietan, euskarak hemen duen garrantzia nabarmentzen ahalegintzen gara. Kalean Bairekin bat eginez, konpromiso hori ofizial egin dugu. Familiei egindako harrera elkarrizketetan, haurrak, D ereduan eskolatzeaz gain, euskara sailak antolatzen dituen indartze jardueretan parte hartzera animatzen saiatzen gara, ikasturtean zehar eskuratutako ezagutzak gal ez ditzaten.
