San Pedro eta San Martzial jaiei hasiera ofiziala emango zaie gaur, hilak 23, agur ofizialarekin. Aurten ‘Ezezagunok‘ izango dira eguneko protagonistak, irabazi asmorik gabeko antzerki elkarte bat desgaitasun intelektualen bat duten aktoreei antzerkian aritzeko prestakuntza eskaintzen duena. Jaien hasiera honetan, Cristina Laborda alkateak eta elkarteko hiru kideek hitz batzuk esango dituzte udaletxeko balkoitik San Joan sua piztu baino lehen.
Egun hartan, hiriak jarduera sorta handi bat jasoko du aurtengo Sanmartzialei ongietorria emateko. Bidasoako Erraldoiak eta Irungo Atsegiñako erraldoi eta buruhandien kalejirarekin, Peña Poteo txaranga lagun dutela, hiriko erdigunean ibiliko dira 18:30etik aurrera. Hasiera horrela emanda, irundarrontzat emozioz beteriko arratsaldea izango da. 19:00etan San Joan eguneko ohiko zuhaitza jarriko da San Juan plazan, eta jarraian, Irungo Txistulari Taldearen emanaldia izango da.
Arratsaldeak aurrera egin ahala, 20:45ean, Kemen Dantza taldeak aurreskua dantzatuko du plazan jarritako suaren inguruan, eta 21:30ean iritsiko da jaietako agur ofizialaren unea, Cristina Laborda alkateak udaletxeko balkoitik, ‘Ezezagunok Antzerki Taldea’ antzerki taldeko hiru kidek lagunduta.
Ondoren, 21:45ean, alkatea plazara jaitsiko da eta sua piztuko du, txistulari bandaren partaidetzarekin, eta horrela emango zaio hasiera animazioz beteriko gauari, batez ere musikari dagokionez.
22:30etik aurrera, Burrunba elektrotxarangak San Joan plaza eta inguruak animatuko ditu eta, bitartean, Deklibe talde irundarrak Urdanibiako plazan jarritako eszenatokian motorrak berotuko ditu, ondoren, 00:00etan, Gatibu taldearen emanaldia izango baita. Tartean, 23:00etatik aurrera, zango-makilen kalejira egongo da hiriko erdiguneko kaleetan Moonligh Jugglers taldearen eskutik.
Ezezagunok Antzerki Taldea
‘Ezezagunok Antzerki Taldea‘ Luisma Morenok, Miren Etxeberriak eta Ana Perezek sustatutako irabazi asmorik gabeko antzerki elkarte irundar bat da, 2007an sortua, eta desgaitasun intelektualen bat duten aktoreei antzerkian aritzeko prestakuntza eta jendaurreko antzezpenak egiteko aukera ematea du helburu, baita antzerkiaren berezko dinamiken bidez parte hartzaileei eguneroko bizitzan baliagarriak zaizkien tresnak ematea ere.
Elkartearen arrakasta agerikoa da. Bira baten barruan Exacticamente diversa obra eman, Alizia lurralde miresgarrian lanaren berrinterpretazio bat, eta hiru sari eskuratu ditu: Egokitzapen edo Egiletzarik Onenaren Saria eta Jantzien Diseinurik Onenaren Saria Juan Mayorga sarietan eta Antonio Morillas sari nazionala, zeinak antzerkiaren munduan balio sozialak sustatzea saritzen duen.
