Irungo Udaleko Gizarte Ongizateko Arloak asteazken honetan eman du ezagutzera Arraza Diskriminazioa Desagerrarazteko Nazioarteko Eguna ospatzeko prestatu duen egitaraua. Prentsaurrekoan Josu Iguíñiz arloko ordezkariak, Itziar Elizondo teknikariak eta SOS Arrazakeria elkarteko Marling Castillok parte hartu dute. Ekimen honen helburu nagusia Irungo herritarren artean tolerantzia, berdintasuna eta errespetuzko kultura sustatzea da, migratzaileen aurkako gorrotoari aurre eginez.
Josu Iguíñiz ordezkariak tinko hitz egin du azkenaldian indartu diren diskurtso arrazisten aurrean. Azaldu duenez, Udalak ez du onartuko atzerapausorik hirian gero eta handiagoa den kolektibo honen eskubideetan. Egitarau honekin, diskriminazioa bistaratu nahi da, gizarte kohesionatuago bat eraikitzeko bidean Irungo Udalak duen konpromisoa berretsiz.
Jardueren programa
Jarduerak Palmera-Montero Guneko 2. aretoan zentratuko dira. Martxoaren 6an, 17:30ean, ‘Las voces invisibles’ eta ‘Chica seria y responsable’ dokumentalak ikusi ahal izango dira, eta ondoren SOS Arrazakeriako kideekin solasaldia egingo da. Martxoaren 18an, aldiz, 18:30ean, Luis Arrietaren ‘Sustraiak’ dokumentala proiektatuko da, zuzendariak berak parte hartuko duen mahai-inguru bati bide emateko.
Hezkuntza eta sentsibilizazioa txikitatik lantzeko asmoz, martxoaren 11n Maite Franko ipuin kontalaria arituko da 17:00etan. 5 urtetik gorako haurrentzat zuzendutako saioan, ‘Nire etxea zure etxea da’ liburua izango du ardatz. Jarduera guzti hauetarako sarrera doakoa izango da, eta interesa duten pertsona guztiak aretoa bete arte sartu ahalko dira, aldez aurretik izenik eman gabe.
