Irailaren 7an Irun Hiria Musika Bandak kontzertua eskainiko dio hiriko zaindariari, Junkaleko Andre Mariari. Iraileko kultur agendaren barruan, 19:45etan hasiko da kontzertua, eta, aurtengo udan plazatxoko programazioarekin gertatu izan den bezala, sarrera gonbidapen bidezkoa izango da: ikuskizuna baino 50 minutu lehenagotik jaso ahalko da. Ildo horretatik, pandemia dela-eta, edukiera mugatuko da, gel hidroalkoholikoa banatuko da, eta maskara erabili beharko da nahitaez.
Buelta agertokietara
Bederatzi hilabetez, Banda geldi egon zen erabat, pandemia zela-eta, baina, joan den abuztuaren 8an, azkenean, irundar ikus-entzuleekin elkartu zen berriro, Junkal plazatxoan bertan emandako kontzertu batean. Oraingoan, berriz, AMAIA KZko udazkeneko kontzertu denboraldiaren aurretik, Irungo zaindariaren omenez eman ohi duen kontzertua emango du.
Askotariko estiloetako obrek osatzen dute kontzerturako prestatutako programa: pasodobleek, zarzuelak, euskal musikak, musikalek… Gainera, Euskal Herriko festak hiru mugimenduko obra estreinatuko da, zeina Joaquín Silguero irundar musikariak 2015ean konposatu zuen Euskalerriaren Adiskideen Elkarteko adiskide oso izendatua izan zela ospatzeko. Hona hemen programa osoa:
PROGRAMA:
- GUADIX (pasodoblea)…………………………………………. Primitivo Azpiazu (1912-1990)
- EUSKAL HERRIKO FESTAK (hiru mugimenduko obra) Joaquín Silguero (1943)
- FEUERFEST (polka)…………………………………………………. Josef Strauss (1827-1870)
- DUBLIN DANCES………………………………………………………. Jan Van der Roost (1956)
- SENDEJA CLUB (pasodoblea-martxa)……………………. Dionisio Borea (1907-1940)
- EL CHALECO BLANCO (aukera)………………………… Federico Chueca (1846-1908)
- JESUS CHRIST SUPERSTAR (aukera)…………………. Andrew Lloyd Weber (1948) (mold.: W. Hautvast)
- – QUEEN IN CONCERT…………………………………………………………….. (mold.: J. Bocook)
Irun Hiria Musika Banda
Zuzendari titularra: Garikoitz González Munduate
