Uztailean Irunen hotel-okupazioa %96koa izan da, iazko uda eta 2023ko uztaila baino puntu bat altuagoa. Bestalde, batez besteko egonaldia bi gaukoa izan da pertsonako, eta 2023ko batez bestekoarekin alderatuta puntu bat igo da.
Irunen lo egin duten pertsonen jatorriari dagokionez, iazko urtearekin alderatuta zertxobait aldatu da, 2023ko uztailean %75 bertakoak eta %25 atzerritarrak baziren, oraingoan turismo nazionala %57koa izan da eta atzerrikoa %43koa.
Nuria Alzaga, Bidasoa bizirikeko presidenteak, emaitza hauek oso positiboki baloratu ditu: “Oso pozik gaude uda honetako zifrekin. Okupazio altuak eta bisitarien aniztasunak erakusten dute Irun turismo-helmuga erakargarri eta irisgarri gisa kokatzeko egin dugun ahalegina. Lanean jarraituko dugu turista nazionalak eta internazionalak erakartzeko eta esperientzia paregabeak eskaintzeko.”
Atalaia hoteleko María Candela Fernández de Valderramak uztaileko hilabetea oso positiboki baloratu du: “Guretzat oso garrantzitsua da ekaina eta uztaila onak izatea, eta aurten hala izan dela esan dezakegu. Orain udazkena ere turistentzako erakargarria izan dadin lan egitea dagokigu.”
Turismo-helmuga adimenduna
Irun jasangarritasunarekin eta irisgarritasunarekin konprometitutako turismo-helmuga adimendun gisa finkatu da, garapen orekatua eta arduratsua sustatzeko. Hiriak bere kultura- eta natura-ondarea kontserbatzera eta hobetzera bideratutako hainbat ekintza inplementatu ditu, bisitariaren esperientzia optimizatzeko eta ingurumen-inpaktua murrizteko irtenbide teknologiko aurreratuak integratuz.
“Oiassoko terma erromatarrak birgaitzea eta Irugurutzeta ingurua biziberritzea bezalako proiektuak estrategia honen adibide nabarmenak dira, Irun turismo jasangarri eta irisgarrian erreferente gisa kokatzea bilatzen duena, turistei zein tokiko pertsonei mesede eginez” azpimarratu du Alzagak.
Turismo Bulegoko bisitak
Uztailean Iruneko Turismo Bulegoan 1579 pertsona artatu dira aurrez aurre, eta 151 pertsona kontsulta ez-presentzialen bidez, hala nola telefono eta posta elektroniko bidez. Bisitarien artean, %77 inguru estatukoak ziren, %15 frantsesak, %6 ingelesak eta alemaniar eta italiar batzuk ere bai.
Turismo nazionalari dagokionez, Irunen oporretan egon diren gehienak Madrildik, Kataluniatik, Gaztela eta Leondik eta Andaluziatik etorri dira. Azken bi komunitate hauetako bisitarien hazkundea joera gorakorra izan da azken urteetan.
Kontsulta ohikoenak informazio orokorra, mapak, liburuxkak eta ondarea izan dira (%34), ondoren agenda, jai eta ekitaldiak (%21), familia-turismoa (%10), bisita gidatuak (%5 baino gehiago), Santiago Bidea (%5), enogastronomia (%5) eta natura (%4).
Alzagak gehitu duenez, “uztaileko hilabete honetan aurreikuspen guztiak gainditu dira. Gainera, bisitan etorri direnak gero eta denbora gehiago igarotzen dute hirian eta gure toki enblematikoenekiko interesa erakusten dute. Abuztuan datuak berdin edo hobeto jarraitzea espero dugu.”
