Maiatzaren 15ean zabalduko da ‘AbenturaERO’ 2023 udalekuetan parte hartzeko izena emateko epea. Programak astebeteko jarduerak jasotzen ditu astelehenetik larunbatera, goizez, eta ostiraletik larunbaterako gau bat gehitzen zaio. Parte-hartzaileek eskalada, padel surfa, slackline eta abentura parkera bisita bezalako jarduerez gozatuko dute.
Aurten ere, Gazteria Sailak AbenturaERO udalekuak aurkeztu ditu. Gazteek jarduera ludikoak izateko eta euskara sustatzeko eta praktikatzeko apustua da. Aisialdi osasungarri eta hezitzailerako eskaintza da, jolaserako, gozamenerako, autonomia pertsonalerako, bizikidetzarako eta dibertimendurako jarduerak sustatzeko. Iaz ere arrakasta handia izan zuen programa batean parte hartzera animatu nahi zaituztegu.
Deialdia 2012 eta 2015 artean jaiotako pertsonei zuzenduta dago, urte biak barne, eta hiru txandatan egingo da. Aurten 60 plaza eskaintzen dira guztira. Izena emateko epea maiatzaren 15etik 25era egongo da zabalik, biak barne.
Aurretiko izen-emateak udalaren webgunearen edo udal-autozerbitzuko terminalen bidez egin daitezke. Fitxa bakoitzean bi aurreinskripzio onartuko dira (anai-arrebena, lagunena, etab.), betiere txanda berekoak badira.
Hona hemen txanden zerrenda:
- txanda: uztailaren 24tik 29ra.
- txanda: uztailaren 31tik abuztuaren 5era.
- txanda: abuztuaren 7tik 12ra.
Txanda guztiak euskaraz dira. Txanda bakoitzean 20 plaza eskaintzen dira guztira, eta horietatik txanda bakoitzeko plaza bat gordeko zaie dibertsitate funtzionala duten haurrei edo instituzionalizatuei.
Udalekuetan parte hartzeko, zozketa egingo da aurkeztutako eskabideen artean. Onartuen eta baztertuen behin-behineko zerrenda maiatzaren 30ean eta 31n kontsultatu ahal izango da www.irun.org webgunean, 010 eta 943 50 51 52 telefonoetara deituz eta udal autozerbitzuko terminaletan. Bi egun horietan, interesdunek egokitzat jotzen dituzten alegazioak egin ahal izango dituzte. Ekainaren 5ean, 10:00etan, plazen zozketa publikoa egingo da, aurrez zehazten den lekuan. Emaitzak ekainaren 8an jarriko dira ikusgai Udalaren webgunean, 010 eta 943 50 51 52 telefonoetan eta udal autozerbitzuko terminaletan. Azkenik, behin betiko izen-ematea ekainaren 12tik 19ra egingo da.
Prozesu osoa amaitutakoan, bilera bat egingo da udalekuetara joango diren gurasoekin, programa horri buruzko informazio guztia partekatzeko.
