Aurreikusita zegoen bezala, Euskadiko, Nafarroako eta Iparraldeko traktoreak Biriatuko ordainlekuan elkartu dira. Asmoa da mugan merkantzien zirkulazioa 24 orduz, ekainaren 3ko goizeko 10:00etatik ekainaren 4ko goizeko 10:00etara, ixtea. Mobilizazio hauen bitartez lehen sektoreko langileek beren eskakizunak Europan entzutea nahi dute.
Errepide mozketa aurreikusitakoa baino apur bat beranduago gertatu da, 10:20ak aldera. Protestak 24 ordu iraungo du eta merkantzien zirkulazioa etengo dute mugan, horretarako bidesaria eta autobideko errei gehienak moztuz. Dena den, autoek eta larrialdietako ibilgailuei igarotzen utziko diete, errei bakarra zabalik utziko diete.
Protesta Europako Parlamenturako hauteskundeen astean egingo dira. Hauek dira nekazari eta abeltzainen aldarrikapen nagusiak: sektorean ekoizpen-bide gisa erabiltzen diren energien zergak kentzea (gasa, elektrizitatea eta hidrokarburoak), beste sektore batzuek duten bezala. Gainera, Europan sartzen diren produktuetarako elikadura-segurtasun handiagoa eskatzen dute, bai eta «ispilu-klausula» izenekoen bidez horiek arautzea ere. Era berean, tokiko produktuei lehentasuna emango dien Europako lege bat sortzea eskatzen dute.
Irungo Udalaren kezka
Protesta deialdiaren aurrean Irungo Udala kezkatuta agertu da blokeo horrek hiriko barne-mugikortasunean eta hiritik igaro behar dutenengan izan ditzakeen ondorioengatik.
Hiriko trafikoan ahalik eta eragin txikiena izateko udalak har ditzakeen neurrietatik harago, udalak agintari eskudunei eskatu die konpromisoa har dezatela eta behar diren baliabideak presta ditzatela hiriak egun horretan egoera zailik jasan ez dezan. Alde horretatik, udala harremanetan jarri da Eusko Jaurlaritzako Trafiko Zuzendaritzarekin gai horren berri emateko.
Era berean, Irungo Udalak dei egiten die herritarrei, eta eskatzen die ahal den neurrian ez dezatela erabili ibilgailu pribatua protestak irauten duen bitartean.
