Ander Izaguirre kazetariak Internet bidezko hitzaldi bat emango du, ostegun honetan, 19:30ean, Kultura arloak sustatutako “Zure abenturaren bila” programaren barruan.
Pirenaika liburuaren aurkezpena
Irungo Udala aste hauetan Internet bidez eskaintzen ari den kultur agendaren barruan, maiatzaren 28an, 19:30ean, Ander Izaguirre kazetariak Pirenaika liburua aurkeztuko du, “Zure abenturaren bila” programaren esparruan. Covid-19 gaitzak eragindako osasun krisialdira arte, 30 urtez, Amaia KZn eraman da aurrera programa hori, baina, alarma egoeraren ondorioz, formatuz aldatu, eta, orain, Zoom eta YouTube bidez egiten dira saioak.
Formatu berriarekin egiten den bigarren kapitulua izango da: joan den astean, Izaguirrek berak inauguratu zituen Internet bidezko aurkezpenak, Txernobylera egindako bidaia bat azalduta. Ostegun honetako hitzaldia Zoom bidez jarraituko ahalko da, baita Ander Izaguirrek YouTuben duen kanalaren bidez.
