Irungo Udalaren telefono bidezko arreta zerbitzuak (010 eta 943 50 51 52 zenbakiak) herritarren funtsezko tresna izaten jarraitzen du. 2025ean, zerbitzuak guztira 91.101 dei jaso zituen, hau da, egunean batez beste 304 deiri erantzun zitzaien. Eraginkortasuna nabarmena da, itxaronaldia, batez beste, 19 segundokoa baino ez baita izan.
Jon Ugarte Gobernu Irekiko eta Herritarren Parte Hartzeko ordezkariak eta Gaizka Iriarte Gureak Dataposteko zuzendariak eman dute datu hauen berri gaur goizean. Azaldu dutenez, 2012an zerbitzua martxan jarri zenetik milioi bat dei baino gehiago (1.181.111 zehazki) kudeatu dira. Ugarteren ustez, datu hauek irundarrek zerbitzuarekiko duten “konfiantza handia” eta “iritzi ona” islatzen dute, eta Udalak bide horretan jarraitzeko asmoa berretsi du.
Kontsulten gaiak eta ordutegiak
Deien arrazoi nagusiari dagokionez, informazio orokorra eskatzea da ohikoena (% 46,6), hala nola kultur agenda, dirulaguntzak edo izapideei buruzko xehetasunak. Jarraian, hitzorduak eskatzeko edo kexak bideratzeko deiak datoz (% 12,8). Interesgarria da deien % 16 Udalarekin zerikusirik ez duten gaien ingurukoak direla, herritarrek zerbitzua hiriko kontsultetarako erreferentzia gisa erabiltzen dutela frogatuz.
Jarduerari dagokionez, goizeko tartean pilatzen da lan handiena: deien % 88 goizeko 9:00etatik 14:00etara bitartean jasotzen dira. Urteko bilakaerari begiratuz gero, udaberrian eta udazkenean kudeatzen da dei bolumen handiena, sasoi horietan izaten baitira Udalaren kanpaina nagusiak.
Inklusioaren aldeko apustua
Zerbitzu honen berezitasun bat kudeaketa ereduan datza, Gureak Datapost enpresa sozialarekin elkarlanean egiten baita. Aliantza honen bidez, desgaitasuna duten pertsonen laneratzea sustatzen du Udalak. Gaur egun bost langile aritzen dira zeregin horretan, eta kopurua bederatzira arte igotzen da eskari handiko garaietan. Herritarrek oso ondo baloratzen dute lan hau, 5etik 4,6 puntuko puntuazioa emanez asebetetze-inkestetan.
Irungo Udalak 010 eta 943 50 51 52 zenbakien bidezko arreta hau eskaintzen jarraitzen du, astelehenetik ostiralera (8:00etatik 19:00etara) eta larunbat goizetan (8:30etik 13:30era), herritarrei bide gertuko, azkar eta inklusiboa bermatzeko helburuarekin.
