Irungo Udalak arreta berezia eskainiko dio azaroaren 20an ospatuko den Haurren eta Nerabeen Nazioarteko Egunari, eta adin-tarte horretako herritarrei zuzendutako askotariko egitaraua prestatu du azaro osorako. “Sortu eta disfrutatu, eskubideak baliatu” lelopean, jarduerak GazteARTEan zerbitzuaren bidez antolatu dira, Txikis del Bidasoa eta Skola Musik elkarteekin elkarlanean. Sandra Caballero Hezkuntzako eta Gazteriako ordezkariak azpimarratu duenez, ekimenaren helburua da haur zein nerabeak gizartearen oraina eta eragile aktiboak direla gogoraraztea, haien ongizatea, hezkuntza, aisialdia eta parte-hartzea bermatuz. Irunek 2021etik UNICEFen “haurren hiri laguna” aitorpena duela ere ekarri dute gogora.
Kulturak pisu handia izango du azaroko ostiraletan CBA zentroan. Azaroaren 13an, IrunBIXI Haurren Foroko kideek musika-tresnak jotzen ikasteko tailerrak izango dituzte Skola Musik-en eskutik. Ondoren, azaroaren 20an, CBAko IrekiArt guneak “Txikirock: euskal rockari errepasoa” kontzertua hartuko du 17:30ean (9 eta 11 urte bitartekoentzat, doan sarrerak bete arte), Kortatu, Itoiz, Hertzainak eta Zea Mays taldeen abestiekin. Hilabeteko azken ostiralean, hilak 27, La Curiosa konpainiaren “Texturas” 360º-ko ikuskizuna iritsiko da, 0 eta 5 urte arteko haurrentzat (2024ko Fetén saria jasotakoa); bi emanaldi eskainiko dituzte (17:00etan eta 18:30ean), eta sarrerak udal-webgunean eskuratu daitezke.
Jardueren artean nabarmentzekoa da, halaber, Carlos González pediatra eta idazle ezagunak azaroaren 19an (17:30ean) CBAn emango duen hitzaldia, haurren loaren mito eta gomendioei buruzkoa. Ekitaldirako gonbidapenak agortuta daudenez, saioa streaming bidez jarraitu ahal izango da IrekiArt aretoan plazak bete arte. Bestalde, azaroaren 21ean, larunbatarekin, 4 eta 11 urte artekoentzako “Familia ta Lagun” egitasmoak Niala magoaren “Magia Zaparrada” ikuskizuna eskainiko du (izen-ematea doan udal-webgunean). Egitaraua borobiltzeko, Artia eta Martindozenea Gaztelekuek grafiti-tailer bat antolatu dute IrunBIXI Nerabeen Foroarekin batera, eta bertan parte hartzeko izena gaztelekuetan eman daiteke.
