Stadium Galek irudi berritua eta irisgarriagoa aurkeztuko du 2026/2027 denboraldirako, irisgarritasuna hobetzeko neurri-sorta zabal bati esker. Irungo Udaleko Kiroletako zein Obrak, Mantentzea eta Azpiegituretako arloek bultzatutako lanek 360.000 eurotik gorako aurrekontua izan dute. Esku-hartze honen helburu nagusia estadioa erabat egokitzea izan da, erabiltzaile zein zale guztiek benetako irisgarritasuna izan dezaten Real Unión animatzera joaten direnean.
Azpiegitura berri nagusia jada prest eta erabilgarri dago mendebaldeko harmaila nagusian; hain zuzen ere, Patricio Arabolaza kaletik sarrera duen igogailu berria jarri da. Elementu honek harmailetako bi kotetara iristea ahalbidetzen du, zaleen ikusmenari inolako eraginik egin gabe. Gainera, harmaila nagusi horretan bertan, mugikortasun urriko pertsonentzat erreserbatutako eremu berri bat ere prestatu da, aurretik zeuden eserleku batzuk kenduz gurpil-aulkientzako eta haien laguntzaileentzako leku nahikoa bermatzeko.
Azkenik, estadio barruko zerbitzuak ere egokitu dira erabiltzaile guztien beharrei erantzuteko. Hain zuzen ere, mendebaldeko harmailako iparraldean eta ekialdeko harmailako lehen solairuko gimnasioaren inguruan dauden komunak berritu dira, barne-banaketa berria eginez mugikortasun urriko pertsonentzat irisgarriak izan daitezen. Hobekuntza hauek guztiak asteburu honetatik aurrera egongo dira erabilgarri herritarrentzat.
