Gipuzkoako Diabetes Elkarteak erronka solidario handi bati ekingo dio apirilaren 19tik 26ra bitartean, diabetesari ikusgarritasuna emateko eta ikerkuntzarako funtsak biltzeko asmoz. Ana Isabel Pineda korrikalariak zazpi maratoi osatuko ditu zazpi egun jarraian, Euskadiko hiru lurraldeetako hainbat herri eta atletismo pista bisitatuz. Ekimen honekin, elkarteak gaixotasunaren inguruko kontzientzia zabaldu nahi du gizarte osoan, baita tratamendu berriak eta sendabidea bilatzeko baliabide ekonomikoak lortu ere.
Parte-hartzea herritar guztiei irekita dago eta hainbat modu daude proiektuarekin bat egiteko. Alde batetik, korrika egiteko dortsala eros daiteke, Ana Isabeli pistetan laguntzeko eta bakoitzak nahi duen distantzia zein ritmora korrika edo oinez egiteko. Bestetik, bertaratu ezin dutenentzat Zero Ilara izeneko dortsal solidarioa prestatu dute, ikerkuntzarako zuzeneko dohaintza gisa funtzionatzen duena. Gainera, elkarteak herritarrak animatzen ditu probak egingo diren lekuetara hurbiltzera, korrikalariari indarra emateko eta bertan egongo diren informazio-mahaietan elkartearen lana ezagutzeko.
Abiapuntua Irunen
Egitaraua apirilaren 19an hasiko da Irungo Colón Pasealekuan, goizeko 10:00etatik arratsaldeko 18:00etara. Hurrengo egunean, apirilaren 20an, Lasarte-Oriako Atsobakar pista izango da topagunea arratsaldeko 16:00etatik gaueko 21:00ak arte. Apirilaren 21ean Errenteriako Mikel Odriozola Estadiora helduko da erronka, 13:00etatik 19:00etara, eta apirilaren 22an Santurtziko atletismo pistara, 11:00etatik 19:00etara. Azken txanpan, Bilboko Zorrotza pista bisitatuko dute apirilaren 23an goizeko 10:00etatik 17:00etara aurrera, Basauriko Artunduaga pista apirilaren 24an 12:00etatik 18:00etara , eta erronka Gasteizko Mendizorrotza pistan amaituko da apirilaren 26an, 9:00etatik 18:00etaraegun osoko jardunaldiarekin.
Izen-ematea eta dortsalak lortzeko prozesua elkartearen webgunearen bidez kudeatzen da, prozedura erraz baten bidez. Interesatuek 665 717 230 telefono zenbakira deitu edo WhatsApp mezu bat idatz dezakete edozein zalantza argitzeko edo kolaborazio berezi bat proposatzeko. Ekimen honen bitartez, Gipuzkoako Diabetes Elkarteak bere zerbitzuen jarraipena bermatu nahi du, kideei eta senideei egunerokoan laguntza, prestakuntza eta baliabideak eskaintzen jarraitu ahal izateko.
