Angel Bermejo Nexas izenez ezagunagoa da raparen munduan. Orain dela aspaldi hasi zuen bere ibilbidea musikaren munduan, baina prest dauka 2022an zehar partekatuko den eduki berri asko. Abestiak “NexasEstaMuerto” Youtube kanalean partekatzen ditu. Rap kantariak azaldu duenez datozen hilabeteetan bi disko kaleratzeko asmoa du, lehena Jetlag izenekoa.
Nola hasi zinen raparen munduan?
Gustuko nuen musika entzuten sartu nintzen raparen munduan, hau da, momentuan gehien gustatzen zitzaizkidan artistak entzunez. Apurka-apurka rap batailetan parte hartzen hasi nintzen Acto Messie, Aigor edo hemen inguruko raperoekin, izan ere, beti asko lagundu izan digute inguruko rapero hasiberriei. Gure lokaletik pasatzen ziren eta, horrela, errima batzuk egiten hasi ginen. Konturatu gabe sartu ginen mundutxoan eta orain ezin gara handik atera.
Zerk erakarri zintuen gehien rapetik?
Gehien gustatzen zaidana da rapean nahi duzuna esan dezakezula eta inork ez duela esango zuk diozuna. Barnetik daramazuna husteko modu bat da, eta dituzun arazoak mundu osoari kontatzeko modu erraza. Jendea entretenitzeko ere balio dezakeela uste dut.
Zertan inspiratzen zara zure sorkuntzetarako?
Printzipioz ez dut inspirazio iturri zehatzik. Nahi dudana da oinarri guztiak ekoizleenak izatea. Adibidez, 7 AMko Acto Messierekin lan egin izan dut edo Denisen Viassérekin. Haiek oinarri bat pasatzen didate, nik erritmoa hartzen dut, eta orduan hasten naiz pentsatzen ea gustatzen zaidan, ondo gera daitezkeen esaldiekin osatzen saiatzeko. Horrela hasten naiz nire abestiak sortzen.
Zeintzuk dira orain arte argitaratutako lanak?
Orain arte, kanalean singleak eta abesti batzuk baino ez ditut argitaratu. Musika alde batera utzi nuen aldi batez, ikasten hasi eta ez bainuen astirik hainbeste gauza egiteko. Berrogeialdia eta gero lana aurkitu ondoren, rapera itzultzea erabaki nuen, benetan gustatzen zaidan zerbait dela konturatu bainaiz. Orain, 6 kantu dituen Jetlag izeneko disko bat aterako dugu. Udan 4 kantu bilduko dituen beste disko bat aterako dugu, reggaeton motako abesti mugituagoak eta erritmo itsaskorragoekin, dantzagarriagoekin.
Proiektu horiek guztiek denbora behar dute?
Hori da. Batez ere kontuan izanda, nahiz eta jende askok zalantzan jarri, rapero gehienok musika munduaz gain beste lan bat dugula. Beraz, musika lanetik irtetean egiten dugu, eta horrek zailtasun gehigarri bat dakar, eta borrokatu egin behar da.
Kanpoko laguntza ere beharrezkoa da musika egiteko?
Bai, ezinezkoa da hori guztia egitea zure inguruan lagunduko dizun pertsona talderik ez baduzu. Nik laguntza daukat oinarriak egin diezazkidaten eta bideoak prestatzeko laguntza ere badut. Gainera, ideiak ematen dizkidaten edo erabakiak hartzen laguntzen didaten jende askok inguratzen nau. Azkenean, jende horren guztiaren laguntzak eragina izaten du proiektuan eta nik sortutako musikan.
Erraza da ezagunak egingo diren kantuak sortzea?
Ez, zaila da. Horretarako, ezinbestekoa da kanta ona izatea, bestela ezinezkoa da jendeari gustatzea eta entzuleak erakartzea. Gainera, ez dugu ahaztu behar Irunen gaudela eta zure lagunengana, ezagunengana eta, asko jota, zeharkako kontaktuengana iritsiko zarela. Abesti itsaskorra ez bada, ezinezkoa da urrutiago eramatea.
Nola erreakzionatu du jendeak orain arte partekatutako abestiekin?
Orain arte kanalean nituen abestiak aspaldikoak ziren, eta ez dago jakiterik zer harrera izango duten argitaratuko diren hurrengoek. Orain igo dugun lehen abesti berriari jendeak harrera ona egin dio. Denbora askoren ostean argitaratzen den lehen abestia denez ezberdina da, horrek jendea aktiboago egotea eragiten baitu. Orain uste dut maketarekin jendea pixka bat gehiago suspertuko dela, eta udan prest dugun guztia ateratzen dugunean jendea guztiz animatuta izango dugula.
Zein dira diskoak argitaratzeko pentsatutako epeak?
Hurrengo diskoa hilabete batean edo bitan ateratzea gustatuko litzaiguke, baina epeekin arazoak izaten ari gara eta argitalpena apur bat trabatzen ari zaigu. Hurrengo diskoko guztia grabatuta dago, aspaldi egin nituen abesti zaharrak baitira. Abesti horiek berreskuratu ditut eta forma eman diet disko honetan sartu ahal izateko. Horren ostean argitaratuko litzatekeen diskotik masterra bakarrik falta zaigu, beraz, udararako garaiz iristea espero dugu.
Kantuen arrakastarako garrantzitsua al da hedapen lana?
Abesti berriak atera ondoren, hor ibiltzen gara ea kontzerturen bat lortzen dugun. Rap guduak ere asko gustatzen zaizkit eta hemendik aurrera gehiagotan parte hartzen saiatuko naiz. Guduetan aukera duzu zure abestiak edo errimak abesteko eta jendeari gustatzen zaizkion ikusteko beste aukera on bat dira, zure lana erakusten duzulako. Guduetan, jendearekiko kontaktua oso hurbila da; izan ere, zirkulu batean inguratuta zaude, eta zuzenean egiazta dezakezu jendeari iritsi zaion ala ez. Egin duzuna gustatuz gero, jendeak interesa izango du zure izena eta zure sorkuntzen inguruan gehiago jakiteko.
Etorkizunera begira musikatik bizitzea posible ikusten duzu?
Orain lan on bat aurkitu dut eta egoera egonkor batean nago, nire bizitzako zerbait delako eta gustatzen zaidalako. Hori dela eta, inolako presiorik gabe egin dezaket rapa, abestiak etengabe eginez eta etorri behar duena etor dadila.
