Be Veggie Euskadiko jaialdi beganoak beste edizio bat itxi du Irungo Ficoba erakustazokan, bizimodu jasangarri eta kontzientearen inguruko komunitate aktiboaren erreferentziazko topagune gisa sendotuta. Aurten ezarritako bi eguneko formatu berrian —aurreko edizioetako hiru egunen ordez—, azokak 4.000 bisitari jaso ditu guztira asteburuan zehar. Merkataritza-eremua osatu duten enpresa erakusketarien balantzea ere oso positiboa izan da; izan ere, parte hartu duten erakundeen % 80k adierazi du pozik dagoela jaialdian izandako emaitzarekin.
Publikoaren inplikazio eta leialtasun handia izan da aurtengo ekitaldiaren ezaugarri nagusietako bat. Bertaratutakoak ez dira saltokiak ikustera mugatu; aitzitik, 2.400 pertsona inguruk parte hartu dute zuzenean antolatutako 30 jarduera baino gehiagotan, hala nola hitzaldietan, mahai-inguruetan, showcooking saioetan, tailerretan, barre eskoletan eta zuzeneko musika-emanaldietan.
Horrekin batera, edizio honek estreinatutako berrikuntzek harrera oso ona izan dute: Pasaporte Beganoak jaialdia begirada aktiboz ezagutzeko aukera eman die bisitariei, Marrazkimatoia ekimenak 500 erretratu azkar osatu ditu asteburuan, eta Ardor Fest Gipuzkoako Pikante Txapelketak lehia estua ekarri du oholtzara, bi emakume lehen postuetan sailkatuta.
Jatorriari dagokionez, azokak tokiko eta eskualdeko izaera sendoa mantendu du berriro. Parte-hartzaileen artean ordezkaritza handiena izan duten eremuak Bidasoa Beherea (% 37) eta Donostialdea (% 29) izan dira, eta Frantziatik etorritako bisitariak, berriz, guztizkoaren % 8 izan dira. Azkenik, erakundeak nabarmendu du Be Veggieren komunitatea urte osoan zehar mantentzen dela bizirik sare sozialetan; dagoeneko 6.000 jarraitzaile baino gehiago biltzen ditu kanal digitaletan, aurten batutako 400 kide berriei esker.
