Herritarren Arretarako Zerbitzuak 25 urte bete ditu

José Antonio Santano Irungo alkateak eta Mónica Martínez Informazioaren Gizarteko eta Herritarren Parte Hartzeko ordezkariak Herritarren Arretarako Zerbitzuak (HAZ) bete berri dituen 25 urte hauen balantzea egin dute.

«Nork ez du noizbait HAZera jo izapideren bat egiteko. Herritarrek balorazio oso ona ematen diote administrazioarekiko harremanak errazten dizkion zerbitzu honi. Orientazioa eskaintzen diete eta baliabide publikoak eskuratzeko aukera errazten diete, hala nola dirulaguntzak eskatzeko, ikastaroetan izena emateko, udal-programei buruzko informazioa jasotzeko edo dokumentuak eskuratzeko. HAZ izugarri hazi da 25 urte hauetan: kanalak ugaritu ditu eta herritarrentzako zerbitzu gero eta errazagoa da. Modernoa eta irisgarria da, eta arreta eraginkor eta efizientea ematen du», azaldu du alkateak.

HAZ 1997an ireki zen Juan de la Cruz kalean, orduantxe ireki baitziren Irungo herritarrei arreta emateko modua eraldatu eta modernizatu nahi zuen proiektu horren bulegoa. 010 telefonoa martxan jarri zen ere bai. Eredu berria antolakuntza horizontalago bihurtzean eta arreta-funtzioen profesionalizazioan eta espezializazioan oinarritu zen, eta abantaila ugari ekarri zizkien herritarrei, arreta guztia modu integralean bateratu baitzen puntu bakar batean. Ordutegi zabalagoa eskaini zen, eta joan-etorri eta gaizki-ulertu asko saihestu. Gainera, eskatutako izapide asko eta asko unean bertan ebazten ziren. Udalari ere ageriko onurak ekarri zizkion: giza baliabideei etekin handiagoa ateratzen zaie, eskariari egokituta daudelako, eta Udalaren irudia hobetu da, herritarren zerbitzura dagoen erakunde aurreratu eta moderno gisa. HAZ garai berriei egokitu behar izan da, kanal gehiago eskainiz eta bazeudenak herritarren beharren arabera egokituz, eta une oro eutsi dio kalitatezko zerbitzu bat ematearen aldeko apustuari.

2 milioi pertsonari eman zaie arreta aurrez aurre
Ireki zen urtean, HAZek 49.243 pertsonari eman zien arreta aurrez aurre. 25 urte geroago, 4.349.265 pertsonari eman zaie arreta, horietako 1.922.820 aurrez aurre. Hau da, ia bi milioi lagunek jaso dute aurrez aurreko arreta HAZeko bulegoetan mende laurden honetan, eta kopuru horren halako bik kanal guztian batzen baditugu.

Jarduera horren beste mugarri bat 2000. urtean iritsi zen, Udalaren webgunea (http://www.irun.org) abian jarri zenean. Laguntza handia izan zen HAZentzat, hirugarren informazio-kanal gisa. Arreta hori are gehiago indartu zen 2007an, autozerbitzuko terminalekin (62.633 kudeaketa 2021ean bakarrik). Zerbitzu hori hiri osora zabaltzen ari da, gainera, terminalak instalatu baitira Palmera Monteron, San Migelen, Belaskoenean eta Kutxabanken Kateako eta Anakako bulegoetan. Horrez gain, 2008an online tramitazioko lehen egoitza elektronikoa ireki zen, 20 bat izapide egiteko aukerarekin (gaur egun, 72 izapide aktibo ditugu). Azken urtean, 30.738 izapide egin dira bide horretatik.

Lekualdaketa
2013koazaroaren 4an, HAZ+ zerbitzua egungo bulegoetara aldatu zen, San Martzial kalera, hain zuzen. Hobekuntza handiak izan ziren bulegoetan, bitarteko teknologikoetan, antolakuntzan eta jarduteko prozeduretan. Horrez gain, bertan instalatu zen Kontsumitzaileei Informazioa emateko Udal Bulegoa ere, eta atondo bat ere bazuen sarreran, autozerbitzuko terminalak astelehenetik igandera erabili ahal izateko. 2014ko udaberrian Irun Txartela abiarazi genuen. Gaur egun, ezinbesteko tresna da Udalaren eta herritarren arteko harreman elektronikoan, baita beste administrazio batzuekin egin beharreko izapideetarako ere, eta hari esker izugarri ugaritu da egoitza elektronikoaren bidez egiten diren izapideen kopurua. Gaur arte, 42.000 Irun Txartel inguru eman dira.

2014tik aurrera eta COVID-19aren pandemia hasi arte, egonkor mantendu dira aurrez aurreko arreta eta telefono bidezkoa, eta nabarmen egin dute gora kanal elektronikoek, hala egoitza elektronikoko izapidetze elektronikoan nola HAZeko autozerbitzuko terminaletan. HAZek, gainera, hazten jarraitzen du. 2021ean energiaren alorreko aholkularitza-zerbitzu bat abiarazi da, argiaren eta gasaren tarifei buruzko informazioa eta aholkuak emateko, bai eta energia-eraginkortasunaren inguruko dirulaguntzei eta abarri buruz.

Herritarren iritziz, zerbitzu bikaina
Hasiera-hasieratik, HAZek kalitatea bilatu du antolakuntzan eta funtzionamenduan. AENORek emandako ISO 9002 ziurtagiria lortu zuen Euskadiko lehen zerbitzu publikoa izan zen, eta Estatuko lehen hiruetako bat, 1999an. Kalitatearen sistematikan beste aurrerapauso bat eman zen 2013an, zerbitzu-karta onetsi zenean. Ordutik, zerbitzuaren erabilgarritasuna eta langileen zerbitzurako bokazioa behin eta berriz islatu dira urtero erabiltzaileen artean egiten diren kalitate- eta gogobetetze-inkestetan, eta batez besteko balorazioak bikainak izan dira beti.

HAZek, gaur egun, informazio/izapidetzeko 11 langile ditu, bai eta zerbitzuburua ere, eta funtsezko pieza bat da Udala paperik gabeko administrazio eraginkor eta irisgarriago bat izateko gauzatzen ari garen antolamendu-aldaketan. Antolakuntza, Kalitate eta Informatika zerbitzuekin batera, HAZen egitekoa funtsezkoa da digitalizaziorako eta prozeduren hobekuntzarako. Helburua epeak murriztea da, bai eta prozesuak guztiz trazagarriak izatea ere.

Etorkizunera begirako oparitxo bat
HAZen 25. urteurrena ospatzeko, José Antonio Santano alkateak jakinarazi duenez, aste honetatik aurrera, arkatz bat oparituko zaie HAZera joaten diren guztiei, oroigarri moduan, «Elkarrekin hazten IRUN Seguimos creciendo juntos» leloarekin. «Oparitxo horren bidez HAZen eta herritarren arteko lotura irudikatu nahi dugu, iragan diren 25 urte hauetan eta aurretik ditugunetan hiriaren hazkundearekin batera haziko den zerbitzua baita, eta irundarren beharrei erantzuten diena». Ildo horretan, arkatzaren mutur batean gordailu txiki bat dago eta, bertan, albaka hazi batzuk. Horrela, arkatza bukatzean, lorontzi batean jar daitezke, eta landare bat haziko da. 6.000 ale daude eskuragarri.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude