Irungo Udalak Antonio Mateo Real artistaren ‘Cantera de Olaberria (Irun)’ obra jaso du dohaintza gisa. Egilearen alabak, Marina eta Clara Mateo Guelbenzu, izan dira margolana Irungo alkate Cristina Labordari eman dioten pertsonak. Margolana udal pintura bildumara batuko da.
‘Cantera de Olaberria (Irun)’ obra 1978ko mihise gaineko olio-pintura da, eta beheko eskuinaldean artistak sinatutako udazkeneko paisaia naturala ikus daiteke. Horrela, udal pintura bilduma hiriari oso lotuta dagoen margolari batekin osatuko litzateke, bere koadroetan marrazkigintzarekin duen trebetasuna eta paisaiak hartzeko zuen gaitasuna islatuz.
Antonio Mateo izan zen hirian 2025eko protagonista kulturaletako bat; izan ere, Amaia KZn erakusketa bat izan zuen urria eta azaroa bitartean, bere obran zehar ibilbide bat eskaintzen zuena, errealismoaren eta inpresionismoaren artean eboluzionatzen duena, marrazkiaren aparteko nagusitasunarekin.
2012an hil zen artista, eta portzelanazko dekoratzaile artistiko gisa nabarmendu zen profesionalki. Hori dela eta, pitxerrak eta platerak bezalako elementuetan islatu da bere lana. Bestalde, paisaia da bere koadroetako gai nagusia. Bertan, itsasoak eta mendia tartekatzen ditu, Irun ingurua, baserriak, Bidasoako Nafarroako herriak eta Gipuzkoa eta Santanderreko kantauriar kostaldea zeharkatzen duten beste paisaia batzuk, Europako Mendietaraino.
Antonio Mateo Real
Madrilgo Arte eta Ofizio Eskolan trebatu zen, baina irundartzat har dezakegu, 21 urterekin Porcelanas Bidasoan dekoratzaile artistiko lanetan aritzera etorri zen eta. Are gehiago, berak apaindutako hainbat portzelana Gordailuan daude gaur egun.
Hainbat sari jaso zituen pintura sariketetan; besteak beste, Elías Salaverria Memorialeko lehen saria, 1973an, eta Madrilgo Udazkeneko XXXIV. Erakusketako hirugarren domina, 1963an. Bestalde, bakarkako 36 erakusketa egin zituen, Bilbon, Gasteizen, Donostian, Zaragozan, Santanderren, Huescan eta beste hiri batzuetan, eta taldekako 21etan parte hartu zuen, hainbat hiriburutan.
