Hiriko lehenengo liburutegi librea Almudena Grandes plazatxoan egin ondoren, aurreikusia zegoen bezala, Oinaurre izan da ekimen horren hurrengo helmuga. Ekimenaren helburua da hirian literatura eta liburu-trukea sustatzea.
Horrela, azken egun hauetan, kale-liburutegi berri hori ikus daiteke Jostun plazan, eta dagoeneko, baditu lehen aleak barruan. Beirazko euskarri bat da, eta autore-esaldi ezagun batez errotulatuta dago. CBAren ondoko plazatxoan, Almudena Grandesena da testua, eta oraingoan, Jorge Luis Borgesena, eta euskaraz eta gaztelaniaz dago. Honela dio: “Siempre imaginé que el paraíso sería algún tipo de biblioteca / Beti imajinatu nuen liburutegi-motaren bat izango zela paradisua”.
Liburutegi horietan, liburu bat hartu nahi duenak beste bat uzten du haren truke, eta, horrela, liburutegiak beti dauzka aleak herritarrek erabil ditzaten.
