Betti Gotti elkarteak antolatuta, 2026ko Irungo Koadrila Eguna bi larunbatetan ospatuko da aurten: ekainaren 20an eta ekainaren 27an. Hogei urtetik gorako ibilbidea duen jai herrikoi eta jendetsu honen edizio berriak hainbat aldaketa dakartza. Alde batetik, herri bazkariko zapiaren kolorea laranja izango da. Bestetik, antolakuntzak eskaera-sistema berri bat jarri du martxan txartelak posta elektroniko bidez kudeatzeko, prozesua errazteko asmoz.
Ekainaren 20ean Ficoban
Lehenengo eguna, ekainaren 20koa, Ficobako pabiloietan zentratuko da. Eguneko ekintzak eguerdiko 12:00etan abiatuko dira Peña Poteo Txaranga eta trikitilariekin Alde Zaharreko kaleak girotzeko. Ondoren, 13:00etan kalejira egingo da Urdanibia plazatik hasita , eta 14:15ean herri bazkaria eta globotxupinazoa izango dira Ficoban. Pabiloietako ateak 14:45etan itxiko dira , eta guztira 1.800 pertsonarentzako tokia egongo da, 20 euroko sarrerarekin.
Arratsaldean zehar musika izango da nagusi: 16:00etan DJ Balber arituko da (ateak ordu horretan irekiko dira berriro) , 17:00etan Burrunba txarangoarekin dantzaldia egongo da , 19:00etan DJ Balber itzuliko da eta eguna amaitzeko, 20:30ean, herrira itzulera kalejira egingo da “Karibe Mix Diskojaiaren” eskutik. Gainera, Ficoban Puntu Morea (17:00etatik 20:00etara) eta alkoholaren kontsumoa prebenitzeko stand bat jarriko dira, alkohol-froga eta guzti.
Ekainaren 27an Urdanibia plazan
Bigarren festa eguna Urdanibia plazan garatuko da erabat. Goizeko 09:00etan Koadrilen Gosari Herrikoia egingo da , eta 09:30ean txanden zozketa egin ostean , 10:00etan V. Irungo Goitiberen Sari Nagusia hasiko da 16 urtetik gorakoentzat. Aurten antolakuntzak deialdi berezia egin die emakumeei parte har dezaten , eta gogorarazi du nork bere goitibera diseinatu behar duela. Eguerdian, 12:30ean, Peña Poteo, Txintxarri eta Burrunba txarangekin pintxo pote animazioa egongo da , eta partaideei pintxo eta trago bat emango zaie.
Ondoren, 13:30ean mahai eta aulkien banaketa egingo da koadrilek beren bazkaria plazan prestatu dezaten. Mahai txukun, dekoratu eta originalenaren txapelketa berria sortu da, eta 14:30ean argazkiak aterako dira puntuaketa egiteko, bazkaria eta Bingo Musikatuari hasiera ematen zaion bitartean. Egunari amaiera emateko, 17:30ean kamiseta, mahai apainketa eta bingo musikatuko sariak banatuko dira txarangen laguntzarekin , eta 18:00etan mahaiak jasoko dira.
Izen-emateak eta txartelen salmenta
Ekintza ezberdinetan parte hartzeko epeak eta baldintzak horrela antolatu ditu Betti Gottik:
Ficobako Herri Bazkarirako Txartelak maiatzaren 28ko 12:00etatik maiatzaren 31ra arte erosi ahal izango dira webgunearen bidez 20 euroan. Eskatzaileek elkartearen webgunean sartu eta eskaera zuzenean galdetegi bat betez egingo dute eskaera. Horren ostean, konfirmazioa jasoko dute, libre dagoen tokiaren araberako kokapenarekin, ordainketa webgunearen bidez egingo delarik. Sarrerak zenbakituak dira eta 18 urtetik beherakoei sarrera ez erostea eskatzen zaie, ezingo baitute Ficobara sartu.
Urdanibiako Bazkaria eta Bingorako berriz, plazako bazkarirako aurre-erreserba maiatzaren 28tik ekainaren 12ra egin behar da elkartearen webgunean. Ondoren, ekainaren 12tik aurrera txartelak Urdanibia plazako txosnetan eskuratu beharko dira 15 euroren truke. Bingo musikatuko txartelak 5 euroan egongo dira salgai webgunean.
Gosari herrikoian parte hartzeko izen-ematea maiatzaren 28tik ekainaren 1era bitartean egingo da webgunean 12 euroren truke. Goitibera lehiaketarako izen-ematea ere maiatzaren 28tik ekainaren 1era egongo da zabalik 10 euroan , nahiz eta dokumentuko beste atal batean maiatzaren 25ean irekiko dela aipatu.
Antxeta Irratiarekin batera berreskuratutako kamiseta lehiaketan parte hartzeko diseinuak maiatzaren 28tik ekainaren 15era bitartean erregistratu behar dira webgunean. Kamisetei koadrilan adostutako izen edo goitizen labur bat jarri beharko zaie.
Erakundeei eskaerak eta errespetu deia
2026ko Koadrila Eguna antolatzeko lanak goiz hasi arren, antolatzaileek Udaleko Kultura sailari eskatzen diote adostutakoa errespeta dezala, oztopoak alde batera utzita prozesua erraztu dezala eta beren boluntario-lana aintzat hartuz. Ekimen honek Irungo jaietan duen balio jendetsu eta belaunaldiartekoa azpimarratu dute, eta egoera prekariotik atera eta segurtasun-bermeak lortzeko erakundeen babesa aldarrikatzen dute Betti Gottitik; hain zuzen ere, Udalari eskatu diote jada lanean hasteko 2027ko Herri Bazkaria Irungo hirigunera eraman ahal izateko, herritar profil gehiagotara iristeko asmoz.
Azkenik, herritar guztiei dei egin diete jai-giroan eta errespetuz parte har dezaten, denon artean egun ahaztezin bat eraikitzeko. Bazkarietan errespetuz jokatzea ezinbestekoa dela gogorarazi dute. Ez dituzte onartuko jarrera desegokiak (hala nola, bazkarian zehar zutik jartzea edo janaria botatzea), antolakuntzak neurriak hartu behar ez izateko. Laguntzeko prest dauden boluntarioek bettigotti@gmail.com helbidera idatz dezakete.
