Irungo Udaleko Gazteria arloak, GazteARTEanek, musika ardatz izango duen asteburu osoko egitaraua iragarri du datorren maiatzaren 29 eta 30erako. Ekimen honen bitartez, ‘Konekta Sessions‘ proiektuaren edizio berri bat iritsiko da hirira, musika elektronikoaren munduan tokiko talentu gaztea ezagutzera emateko eta bultzatzeko. Ziklo honi amaiera borobila emateko, eskualdeko DJen saioez gain, Igotz Mendez nafarraren HOFE proiektu musikal arrakastatsua iritsiko da herriko kultur gune nagusietako batera.
Ostiralean, maiatzak 29, arratsaldeko 17:30etik 22:00etara, ‘Konekta Sessions’ ekimenaren azken emanaldia hartuko du Urdanibia Plazak, zehazki Ospitale Zaharraren ondoan. Arratsaldea N97 bikote irundarrarekin (Irune Muguruza eta Jota) hasiko da, 2023tik entzuleen eta house erritmoen arteko batasuna bilatzen ari den adierazpen kulturala. Ondoren, herriko hiru DJ arituko dira ordubeteko txandetan: Tatik (Tania) nazioarteko zein tokiko doinu elektronikoak eskainiko ditu; Varillasek (Javier) 90eko eta 2000ko hamarkadetako minimal house eta tech eraginak ekarriko ditu; eta Aimarrek deep house zein tech house estiloekin itxiko du saioa. Artista hauen zabalkundea handitzeko, saioak Gazteria zerbitzuaren YouTubeko kanalean grabatuko dira, euren karrerak bultzatzeko portfolio digital gisa balio dezaten.
Larunbatean, maiatzak 30, musika ekintza Carlos Blanco Aguinaga (CBA) kulturguneko Irun Zuzenean Aretora lekualdatuko da, 20:30ean hasiko den HOFEren kontzertuarekin, non Irune Muguruza DJak lagunduko dion oholtzan. “AMODIOA” eta “AMORRUA” bezalako lanekin Euskal Herriko proposamen alternatibo eta berezienetako bat bihurtu ostean, artista irundarren aurrera iritsiko da bere hurrengo diskoaren ekoizpenean murgilduta eta udako birari ekin aurretik bere energia zuzenean transmititzeko prest. Kontzertu honetaz gozatzeko azken sarrerak salgai daude dagoeneko eta udalaren webgune ofizialaren bitartez lor daitezke.
