CBA Kultura eta Sorkuntza Zentroak ‘Través‘ proiektuaren performancea hartuko du datorren larunbatean, hilak 20, 20:00etan. Izaro Ieregi Gonzalezek eta Ageda Blasco Egiak osatutako tandemaren eskutik dator, eta Ribera Bekaren azken edizioaren emaitza da.Esperientzia sortzaile bat da, eta horren emaitza pertsona talde ireki batekin batera erakutsiko da.
Lanaren egileek “Bidasoa ibaiarekin gorputzez gorputz subjektu baten adierazpena” esploratzen lan egin dute, “maitasunaren afektu iraultzaileak, ibaiko urak eta lurralde-banaketak zeharkatuta, horrek gorputz- eta afektibitate-banaketa dakarrena”. Artea eta ikerketa uztartzen dituen diziplinarteko performance honetan interesa duten pertsonek, doako gonbidapena eskuratu ahal izango dute udalaren webgunean.
‘Través’
Sorkuntza komunitarioko prozesu bat izan da, gorputz porotsu eta erlazional bat bilakatzeko moduak modu praktikoan ikertzen dituena. Egileek uraren nozio jariakorrarekin eta anonimotasunarekiko maitasunaren afektuarekin lan egin dute, subjektu itzalia eta Bestearenganako joera ulertzen lagunduko duten egoerak esperimentatzeko. Esplorazio hori teorialari feministek subjektu indibidualaren fikzioaren aurrean egin dituzten irakurketen barruan kokatzen da, gaur egun erortzen ari dena, diskurtso distopikoei aurre eginez aukera bizigarriagoak irekitzeko. Gorputz biziaren kalteberatasunaren eta interdependentziaren egoera eztabaidaren erdigunean jarri duten egileak, hain zuzen ere.
Ribera Beka
Ribera Bekaren helburua Bidasoa ibaiarekin, memoria historikoarekin eta mugaren nozioarekin lotutako gaiak landuko dituzten ikerketa-ekintza proiektuak bultzatzea da. Tandem formatuan garatzen da, hau da, arte- eta ikerketa-profilak uztartzen ditu, eta bederatzi hilabeteko iraupena du. Proposamen irabazle bakoitzak 11.250 euroko beka du.
Hasieratik, bi diziplina batzen dituen beka honek, 1993an muga desagertu zenetik Irungo soinu-memoriara edo Bidasoa ibaiari lotutako emozioetara heltzen duten lan artistikoak sortzea ahalbidetu du, ikus-entzunezkoak, eskultura, antzerkia edo performancea bezalako baliabideak erabiliz.
