Datorren astean hasiko dira Dario de Regoyos eta Berrueta Pintorearen kaleetako igotzeko eskailera mekanikoa konpontzeko lanak. Hala jakinarazi du Irungo Udaleko Obra, Mantentze Lan eta Azpiegitura arloak. Maila-katea ordezkatuko da, haren egoera txarra dela eta egon baitira itxita eskailerak azken hilabeteetan. Lanek bi aste inguru iraungo dute.
Martxoan hasitako mantentze-lanetan, hasieran pentsatutakoa baino matxura zailagoa zegoela ikusi zen. Hemezortzi urte dira jada eskailera horiek martxan jarri zirenetik eta, igarotako denbora dela eta, mekanismoak osatzen dituzten elementuetako batzuen bizitza baliagarria amaitzen ari da. Horrela, igotzeko eskailera horren maila-katea ordezkatzeko unea iritsi da. Bestalde, maila-katearen egoera txarra dela eta, itzulerako gidaria higatzen ari da, eta beraz haren errodamenduak ere aldatu beharko dira.
Gorka Álvarez ordezkariak barkamena eskatu nahi izan die “eskailerak konpontzeko atzerapenak kalte egin dien pertsona guztiei, baina matxura espero zena baino handiagoa zen, eta administrazio publikoko kontratazio-prozesuek beren denborak dituzte. Aste batzuk barru, zerbitzua martxan egongo da berriro, ondo funtzionatzeko behar diren berme guztiekin”.
Auzoarentzat ezinbesteko lotunea
2007an jarri ziren martxan Artiako eskailera mekanikoak. Bi ataletan zatituta daude: Juan Thalamas Labandibar eta Dario de Regoyos arteko atala, motzagoa, igotzeko eta jaisteko eskailera banarekin; eta Dario de Regoyos eta Berrueta Pintorearen kaleen artekoa, luzeagoa, hori ere igotzeko eta jaisteko eskailera banarekin.
Bestalde, 2020tik auzoak igogailu bat ere badauka, Dario de Regoyos (10 eta 12 atarien artean) eta Pio Baroja kaleak lotzeko. Igogailu hori har daiteke, hain zuzen, eskailera mekanikoen goranzko noranzkoan ordezko aukera hauek konpontzen dituzten bitartean.
