Ekoetxea Txingudik Plaiaundiko aldaketa ezagutzeko irteera proposatzen du larunbaterako. Pertsona helduentzat antolatutako irteera hau goizeko 10:00etatik 11:30era egingo da eta prezioa 2 eurokoa izango da. Bisitak 90 minutuko iraupena izango du eta elebitan egingo da.
Bisitariek Plaiaundik hegazti migratzaileak babesteko dituen sekretuak ezagutuko dituzte. Era berean, Plaiaundi nola eraldatzen ari den eta keinu iraunkorrek ingurune enblematiko hori zaintzen lagun dezaketela ikusiko dute.
Horrela, ibilaldian hainbat gai jorratuko dira. Batetik, Plaiaundiko paduran bizi den biodibertsitate aberatsa eta ekosistemarako duen garrantzia. Bestetik, giza jarduerak historian zehar ingurune horretan izan duen eragina. Padurak klima-aldaketan duen eragin erregulatzaileaz ere hit egingo dute. Gainera, bisitariek barruko aintzirak bisitatuko dituzte, baita marearteko hondartza ere. Azkenik, espazio horien kalteberatasunari eta babesteko moduari buruz hausnartuko dute.
Ekintzan parte hartzeko izen ematea Txingudi Ekoetxearen webgunearen bitartez egin beharko da.
