Irungo gazteek hitzordu garrantzitsua izango dute datorren irailaren 19an, larunbatarekin, udari amaiera bikaina emateko. Izan ere, egun horretan ospatuko da “UdaTXAO! Art, Music & Chill” jaialdiaren hirugarren edizioa Sargia parkean eta Urdanibia plazan. Ekimen honen bidez, gazteen talentua eta aisialdi kulturala sustatu nahi dira, sormen-tailerrak, arte eszenikoak, gastronomia eta musika emanaldiak uztartuz. Sandra Caballero Hezkuntza eta Gazteriako ordezkariak jaialdian parte hartuko duten hainbat lagunekin batera aurkeztu du egitaraua, eta azpimarratu du ekimena dagoeneko finkatuta dagoela hiriko gazteen artean, Gazteria arlotik jasotzen diren eskariei erantzun zuzena emanez.
Jaialdia Sargia parkean zentratuko da batez ere, 18:00etatik 22:30era bitartean. Arratsalde osoan zehar, giroa etenik gabe alaitzeko ardura Irune eta Unai Muguruza tokiko DJena izango da. Parte-hartze handiko jardueren artean, tokiko artisautzan oinarritutako lau sormen-tailer antolatu dira: Katrin irundarrak zuzendutako zeramika tailerra (Ka. Cerámica), non buztinezko kikarak eta katiluak egingo diren; Helena Benetek gidatutako bitxi tailerra (Kokora Handmade), buztin polimerikoarekin fimozko belarritakoak sortzeko; Maddi Agirregomezkortaren joskintza tailerra (Mimoxa jantziak), kuxinak edo nezeserrak egiteko sashiko teknika japoniarra zein brodatuak erabiliz; eta Olaia Martinez nahiz Maialen Arocena marrazkilariek eskainiko duten tote bag poltsen serigrafia eta estanpazio tailer dinamikoa (18:30etik 20:30era).
Sormenezko eta eskulanetako proposamenez gain, arte eszenikoek eta gastronomiak ere beren tartea izango dute. Batetik, Néstor Gómezek eta Patricia Ardanuyk sortutako La Visionaria ekimenaren eskutik, raclette dastaketa gastronomiko bat egingo da. Bestetik, 21:00etan, Pauso-k Konpaniak dantza taldeak Fluxus ikuskizuna taularatuko du. Lurrean bertan antzezten den 20 minutuko emanaldi honek euskal kultura eta dantza garaikidea balioan jartzea du helburu.
Egunari amaiera emateko, 21:00etatik aurrera, musika izango da nagusi Urdanibia plazan Green Valley reggae talde mitikoaren eskutik. Talde euskal-katalanak 2026 honetan bere heldutasun artistikoa ospatzen du El Arte de Vivir disko berriaren aurkezpenarekin. Bi hamarkadatik gorako ibilbidea duen taldeak bere kantu ikonikoenak eta kantu berriak uztartuko ditu, jai-eremuari kontzientzia soziala, optimismoa eta energia positiboa helaraziz.
Izen ematea
Antolakuntzatik gogorarazi dute tailerretarako tokiak mugatuak direnez ezinbestekoa dela aldez aurretik izena ematea Udalaren webgunearen bidez (lekurik geratuko balitz, egunean bertan ere eman ahal izango da izena). Raclette dastaketaren kasuan, izen-ematea esparruan bertan egingo da, jarduera hasi baino 30 minutu lehenago. Horrez gain, 18:00etatik 20:30era, GazteARTEan zerbitzuaren informazio-stand bat jarriko da Ospitale Zaharrean, Konekta zerbitzuak dinamizatuta, gazteen proposamenak eta intereseko programak biltzeko. Halaber, gogorarazi dute irailaren 11n abiatuko dela 2027ko Aurrekontu Parte-hartzaileen gazte-prozesua online, non gazteei bideratutako 200.000 euroren erabilera erabakiko den.
