‘DokuIrun‘ saioaren baitan, apirilaren 16an 19:00etan zine emanaldi berri bat izango da Amaia KZko auditorioan. Aurten programa horren laugarren jardunaldia izango da. Miguel Angel Llamas eta Amaia Merinoren “Non dago Mikel?” (2020) filma proiektatuko da.
Zintak 80 minutuko iraupena du eta amaitutakoan zuzendariekin solasaldia izango da. Jarduera honek pandemiaren ondorioz kasu hauetarako ezarritako segurtasun- eta higiene-neurriak ditu: edukiera murriztua, gel hidroalkoholikoa, nahitaezko maskara, etab. Sarrerarako gonbidapena ohiko lekuetan lor daiteke: Luis Marianoren Turismo Bulegoan, sarreren salmentarako webgunean edo txarteldegietan ordubete lehenagotik, betiere eserleku libreak badaude.
‘DokuIrun ‘hilaren 30ean itzuliko da Amaia KZ auditoriumera “Homeland Gone” filmarekin.
Sinopsia
1985eko azaroa. Mikel Zabalza autobus gidari gaztea beste pertsona batzuekin batera atxilotu du Guardia Zibilak, terrorismoaren aurkako operazio batean. Gainerako gazteak askatzen dituztenean, basatiki torturatuak izan direla salatzen dute. Baina Mikel falta da. Agintariek diote ihes egin duela eta bizirik aurkitzeko itxaropenak desagertzen ari diren bitartean, Euskal Herriko kaleak garrasi batekin erretzen ari dira: “Non dago Mikel?”.
