Otsailaren 27tik martxoaren 26ra egingo da Irungo Zine Ziklo Feminista. Aurten martxoaren 8aren inguruko programazioan garrantzi berezia izango du zikloak, Irungo Udalak eta Irungo Emakumeen Etxearen Elkarteak (IEEE), elkarren arteko kudeaketaren esparruan antolatu baita. Guztira, iaz estreinatutako eta emakumeek zuzendutako lau pelikula emango dira hilabetez.
Zinema Feministaren Zikloa 2024tik antolatu da. Iaz Ocine Mendibilen egin zen, 230 eserleku zituen areto batean, baina aurten Amaia Kultur Zentroan egingo da, zeinak 600 eserleku baino gehiago dituen. Maite Cortina-k, Berdintasuneko eta LGTBIQ+ Eskubideetako ordezkariak, gaur goizean aurkeztu ditu zikloaren xehetasunak Amaia Kultur Zentroan bertan, Irungo IEEEko Olga Rivas eta Maribel Castelló-rekin batera.
Maite Cortina ordezkariak honako hau esan du: “Zikloaren alde egin dugu, zalantzarik gabe. Iaz, Mendibileko zinema-aretoa txikiegia izan zen, gonbidapenak berehala agortu baitziren. Aurten, ordea, Udalak eta IEEEk ahalegin are handiagoa egin dugu, eta Amaia Kultur Zentrora eraman dugu. Horrela, inor ez da geratuko lau film feminista hauetaz gozatzeko aukerarik gabe”.
Sarrera librea izango da aretoa bete arte, baina gonbidapenak aldez aurretik eskatu beharko dira udalaren webgunean edo turismo bulegoan. Sarrerak soberan geratzen badira, saioa baino ordubete lehenago jaso ahalko dira Amaia Kultur Zentroko leihatilan.
‘Jone, batzuetan’ filmarako sarrerak jada eskuragarri daude. Beste hiru filmentzako sarrerak berriz, hurrengo egunetan irekiko dira. Zehazki, ‘La Furia’ pelikularako sarrerak otsailaren 23tik aurrera eskuragarri egongo dira; ‘Romeria’ filmekoak martxoaren 8tik aurrera; ‘Los Domingos’ pelikula ikusteko gonbidapenak martxoaren 16tik aurrera.
Emakume sinadura duten filmak
Lau jardunaldietan, Itziar Sistiaga idazleak eta Nerea Almazán psikologoak filmak aurkeztuko dituzte, bai eta filma eman ondoren gonbidatuekin egingo diren elkarrizketak ere. Jarraian zikloaren programa eta emango diren lau filmen xehetasunak azaltzen dira:
‘Jone, batzuetan’: Sara Fantova zuzendariaren pelikula euskaraz emango da, otsailaren 27an, 18:00etan.
Bilbo, abuztu bete-betea. Jonek 20 urte ditu, eta bere aitarekin eta Martarekin, ahizpa txikiarekin, bizi da. Aitorrek, Joneren aitak, lana utzi behar izan du Parkinsonaren ondorioz. Aldi berean, Aste Nagusia hastear da eta Jone lehen aldiz maiteminduko da.
Maitemintze horrek eragindako hilezkortasun-sentsazioa biziko du Olgarekin; baina, aldi berean, aitaren gaixotasunagatik bakarrik geratzeko beldurra ere zeharkatuko du Jone.
‘La Furia’: Ostegunean (martxoaren 5a), 18:00etan, Amaia Kultur Zentroak Gemma Blasco-ren obra izango du. Eva Pauné filmaren gidoilariak ondorengo elkarrizketan parte hartuko du.
Alex aktore gaztea bortxatu egin dute Urtezahar gaueko festa batean, eta ez daki erasotzailea nor den. Haren anaia Adrian-engana jotzean, hark zalantzan jarri eta estu hartuko du. Hala, Alex anaiarengandik urrunduko da, lotsak, nazkak eta erruak gaina hartuta. Adrianek, amorruak jota, bide gero eta ilunago bat hartuko du, Alexi lagundu beharrean. Bitartean, Medea pertsonaia mendekuzalea antzeztuko du Alexek; antzerkian aurkituko du bere mina eta haserrea bideratzeko modu bakarra.
‘Romería’: Carla Simón zuzendariaren filma martxoaren 18an emango da, asteazkenean, 18:00etan. Llucía García aktoreak ondorengo elkarrizketan parte hartuko du.
Marina Vigora heldu da bere aita biologikoaren familia ezagutzeko. Aita, ama bezala, HIESaren ondorioz hil egin zen Marina oso txikia zenean. Osabekin, izebekin eta aitona-amonekin elkartzen da, beren kontakizunen bidez haren gurasoen istorioa berreraikitzeko. Denak, ordea, bikoteak zituen droga-arazoez lotsatzen dira, eta Marina bertan egoteak arazo horiek gogorarazten dizkie. Haren lehengusuarekin biziko duen maitasun-istorioak aukera emango dio bere gurasoen istorioa birsortzeko eta haiekin konektatzeko. Hala, ipuin bat sortuko du bere amaren egunerokoarekin, familiaren estigmaz libratzeko eta iragana ulertu ahal izateko… Familiaren memoriari buruzko pelikula honek amaiera emango dio zuzendariaren trilogiari, ‘Verano 1993’ eta ‘Alcarrás’ filmak osatuz.
‘Los Domingos’: Zikloa ixteko, Alauda Ruiz de Azúa zuzendariaren filma emango da, ostegunean, martxoaren 26an, 18:00etan. Blanca Soroa protagonistak ondorengo elkarrizketan parte hartuko du.
Ainara 17 urteko neska idealista eta bikaina da, eta unibertsitateko zein gradu ikasiko duen erabaki behar du. Edo hori espero du haren familiak, behintzat. Ainara, ordea, Jainkoarengandik gero eta gertuago sentitzen da, eta, halako batean, esaten du klausurako moja bilakatu nahi duela. Berri horrek ezustekoan hartzen du familia osoa: horma bat eratzen da euren artean, eta une erabakigarria izango da denentzat.
