Txingudiko errugbi taldeek aste honetako entrenamenduetan landutako erakutsi beharko dute zelaian. Biok Txingudik Bilbon jokatuko du ligako talde indartsuenetako baten aurka, Uni Bilbo. Bestetik, Zaisa Txingudik txipa aldatu duela erakutsi ahalko du etxean, Bera Bera B taldearen kontra arituz.
Goiko multzoan egoteko prest dagoela erakusteko ordua iritsi zaio Biok Txingudiri. Larunbatean, 14:15ean, Uni Bilboren aurka jokatuko du Bilboko Errekalde kiroldegian. Bizkaitarrak hirugarrenak dira sailkapenean 16 punturekin, 4 partidatan 3 garaipen lortu ostean eta Gaztediren aurka jokatutako azken partidan 10-6 galdu ostean. Hala ere, mugako neskak lehiatzeko prest daudela erakutsi dute eta play-offeko postuetatik gertu kokatzen dira 11 punturekin.
Beranduago, 16:00etan, eta Plaiaundin, Zaisa Txingudik Bera Beraren bigarren taldea jasoko du. Pasa den astean izandako sentsazio onekin jarraitu nahi dute Iñigo Camareroren mutilek. Seigarrenak dira beltz-zuriak, donostiarren atzetik, bost punturekin. Prestatzaile irundarraren hitzetan “Bilbon oso ondo jokatu genuen, aurreko partidetan erakutsitako jarrera erabat aldatu genuen eta horrela jarraitu behar dugu, hori baita emaitzak lortzeko modua”.
Klubeko gazteenen partidak
Asteburu honetan Txingudiren gazte talde guztiek izango dituzte partiduak.
Bera Bera/ 18 urtez azpiko Txingudik Donostian jokatuko du larunbatean 14:30tan Elorrio/Arrasateren aurka. Etxekoek ez dute batere erraz izango garaipena lortzea, bizkaitarrak multzoko liderrak baitira.
16 urtez azpiko Txingudi/Baztan taldeak Gasteizera bidaiatuko du Gaztedi Brekin indarrak neurtzeko. Norgehiagoka 12:00etan izango da, larunbatean ere. Lortutako azkenengo garaipenari jarraipena eman nahi diote mugakoek.
14 urtez azpiko gazteak Plaiaundin arituko dira larunbatean, 11:00etatik aurrera, Arrasate/Soragazteak eta Eibar/Mutrikuren aurka lagunarteko bana jokatzen.
Azkenik, errugbi eskolak Hernanin izango du hitzordua igandean 10:30etan. Bertan, etxeko taldeaz gain, Riojaren aurka jokatuko dute.
Txingudiren denda martxan
Klubetik adierazi dutenez, Txingudiren webguneko denda berriz jarri dute martxan kamisetak, motxilak eta bestelako artikuluak erosi ahal izateko. Salgai dagoen material guztia esteka honetan ikusi daiteke.
Euskadiko selekzioaren deialdian
Euskadik Autonomietako Selekzioen arteko Txapelketako bigarren jardunaldia prestatzeko entrenamendura deitua du Aritz Arrieta, Txingudiko 16 urtez azpiko jokalaria.
