Irungo Udaleko Kulturako zerbitzuak herritar guztiei jakinarazten die gaur, maiatzak 25, ireki dela Marrazketa eta Pintura Akademiako eta Zeramika Tailerreko udako ikastaroetan matrikulatzeko epea. Interesdunek ekainaren 12ra (ostirala) arteko epea izango dute izena emateko Udalaren egoitza elektronikoaren bidez. Gainera, Ogasun arloak gogorarazi du izena ematen duten pertsonek gaitasun ekonomikoaren araberako ordaintzeko sistemaz onura atera ahal izango dutela errenta tarte zabalduagoekin, tarifak eskuragarriagoak izan daitezen.
Marrazketa eta Pintura Akademiak hiru ikastaro eskainiko ditu uztailaren 2tik 13ra bitartean, astelehenetik ostiralera, eta guztiek 92,45 euroko prezioa izango dute. Ikastaro bakoitzak 16 orduko iraupena izango du (bi orduko zortzi saiotan banatuta), eta talde bakoitzean gutxienez 5 lagun eta gehienez 10 onartuko dira, aurretiazko esperientziarik behar izan gabe. Eskaintzaren barruan, 6 eta 12 urte bitarteko haurrentzako tailerra dago (10:00etatik 12:00etara) sormena eta adierazpen plastikoa modu ludikoan lantzeko; 11 urtetik aurrerakoentzako marrazketa, pintura eta sormen ikastaroa (10:00etatik 12:00etara) hasi edo sakontzeko ; eta artista-liburua sortzeko tailerra (11 urtetik aurrera, 18:00etatik 20:00etara), non collagea, marrazketa edo estanpazioa bezalako teknikak erabiliko diren. Informazio gehiago HAZean, Kulturako zerbitzuan, pinturamargoa@irun.org posta elektronikoan edota 695 75 29 94 telefonoan jaso daiteke.
Bestalde, Udalaren zeramika tailerrak 5 eta 16 urte arteko haur eta gazteei zuzendutako ikastaro berezi bat eskaintzen du uda honetan, uztailaren 2tik 30era bitartean, astelehenetik ostiralera 10:30etik 12:30era. Ikastaro honen prezioa 125 eurokoa da eta parte-hartzaileek oinarrizko teknikak probatzeko aukera edukiko dute, hala nola imurtxia, lisatzea, txurroak, modelatzea eta engobea (piezari kolorea ematea labean sartu aurretik). Behin labean egosi eta muntatu ondoren, ikasleek platerak, katiluak, muralak edota imitaziozko bitxiak bezalako pieza erabilgarri eta apaingarriak sortuko dituzte. Argibideak zeramika@irun.org helbidean edota 617 47 90 21 telefonoan daude eskuragarri.
Prezio egokituak
Diru-sarrerak kalkulatzeko orduan, lau errenta tarte ezarri dira (19.417 eurora arte; 19.417 eta 29.911 euro artean; 29.911,01 eta 37.136 euro artean; eta azken kopuru horretatik gora), eta hainbat kenkari aurreikusten dira 22 urtetik beherako ondorengoen kopuruaren, desgaitasun-egoeren edota guraso bakarreko familien kasuan. Iaz sistema hau aplikatzeko Udalari datuak kontsultatzeko baimena eman ziotenek ez dute aurten izapide hori berriro egin beharko.
