Inauteriak hasi aurreko aste hauetan Inudeak eta Artzainak konpartsaren xehetasunak lotzen ari da Eraiki dantza taldea. Taldeak bi entsegu antolatu ditu otsailaren 12an Zabaltza plazan egingo diren dantzak prestatzeko.
Inudeak eta Artzainak konpartsaren entseguetarako ohiko datak eta ordutegiak mantentzen ditu Eraikik. Lehen entsegua joan den larunbatean, otsailaren 4an, arratsaldeko 16:00etan egin zen. Bigarren entsegua, ordea, desfilearen aurreko egunean egingo da, hau da, otsailaren 11n, datorren larunbatean, eguerdiko 12:00etan. Lehenengoa bezala, bigarren entsegua ere Behobiako plazatxoan izango da eta euria egiten badu Gazteluzar ikastetxeko gimnasio estalian. Entsegu hauek Inudeak eta Artzainak konpartsa osatzen duten eta Zabaltza plazan dantzatzen duten dantzariei zuzenduta daude.
Desfileari buruzko xehetasunak
Azkenik, otsailaren 12an Inudeak eta Artzainak konpartsaren Irungo desfilea ikustera joateko deia egin die Eraiki dantza taldeak herritar guztiei. Konpartsak ohiko ibilbidea egingo du, 12:00etan Santiago kaletik irtenda, eta Eskola kalea, Eliza, San Juan plazan geldialdi txiki bat eginez, Kale Nagusia, Foru kalea eta Cólon pasealekua zeharkatuko ditu. Zabaltza plazan, ohi bezala, Udal Musika Kontserbatorioko Bandaren erritmora dantzatuko da. Azkenik, desfilea Luis Mariano kalean amaituko da.
