Irungo Udaleko Gizarte Ongizateko Arloak, hiriko adinekoen elkarteekin batera, Adineko Pertsonen Astearen egitaraua aurkeztu du. Urriaren 1etik (Adinekoen Nazioarteko Eguna) 8ra bitartean egingo den ospakizun honetan, era guztietako jarduerak eskainiko dira: kultura, hitzaldiak, kirola eta aisialdia.
Cristina Laborda alkateak azpimarratu duenez, adinekoak “hiriaren nortasunaren eta historiaren zati ezinbestekoa” dira, eta aste hau entzuteko nahiz haiekin ikasten jarraitzeko aukera paregabea da. Bestalde, Josu Iguiñiz Gizarte Ongizateko ordezkariak gogorarazi du Udalak hiria zahartze-prozesura egokitzeko eta pertsona horien bizi-kalitatea hobetzeko konpromiso sendoa duela.
Egitaraua urriaren 1ean abiatuko da, Adinekoen Nazioarteko Egunean, ‘Adinekoak gogoz‘ jaialdiarekin Amaia Kultur Zentroan, arratsaldeko 17:30ean. Urriaren 2an, ostiralez, bi proposamen nagusi izango dira: Zelaiburu elkarteak antolatutako ibilaldi neurtua Katea auzoan (16:30) eta 80º norte: donde el tiempo se congela dokumentalaren proiekzioa zein hitzaldia Esther Aristietarekin Emakumeen Etxean (18:30). Larunbatean, urriak 3, Lapitzeko auzo-elkartean ‘+60Art’ arte-tailer kolaboratiboa egingo da mural bat sortzeko 11:00etan, eta arratsaldeko 18:00etan Kateako 90 urtetik gorako herritarrak omenduko dituzte.
Igandean, urriak 4, musikak eta kirolak hartuko dute protagonismoa, 18:00etan Zabaltza plazako kioskoan Tsunami orkestraren dantzaldia eta ‘Nagusikleta’ bizikleta-ibilaldiak egingo baitira. Astelehenean, urriak 5, bizikletan ibiltzen ikasteko tailerra eskainiko da Ibarlako Bide Heziketako pistan, 11:00etan. Asteartean, urriak 6, hiru jarduera ospatuko dira: ‘Tipi Tapa’ martxa arautua Luis Marianotik abiatuta 10:00etan, Soroxarta elkartearen txokolatada eta dantzaldia Belaskoeneko Gizarte Etxean 17:00etan, eta “Sin canas en la lengua” antzezlana Amaia Kultur Zentroan 18:00etan.
Astea amaitzeko, urriaren 7an Patxi Izaguirrek “Envejecer de forma elegante” hitzaldia eskainiko du San Migelgo Adinekoen Gune Sozial berrian 17:00etan, autozainketa eta babes-sareak hizpide hartuta. Azkenik, urriaren 8an, Elisabeth Justicia ilustratzaileak “La (falsa) representación de la mujer mayor” hitzaldia emango du Emakumeen Etxean 18:30ean.
Izen ematea
Doako jardueretarako sarrerak edo izen-emateak (hala nola Amaia KZko emanaldietarako edo bizikleta-tailerrerako) irailaren 25etik aurrera egongo dira eskuragarri Luis Mariano kaleko turismo-bulegoan zein Udalaren webgunean.
